Tinuig Nga Tradisyon Sa Flores De Mayo

Ang Flores de Mayo, kon “Bulak sa Mayo”, usa ka selebrasyon nga gihimo sa tibuok bulan sa Mayo alang sa pagpasidungog kang Birhen Maria. Kini tapuson sa usa ka relihiyoso, makasaysayanon ug kultural nga prosesyon nga gitawag ug Santacruzan.

Niadtong May 27, 2023 Sabado, ang GKK Maglana Zone 2 sakop sa Parokya sa Our Mother of Perpetual Help nagpahigayon ug tinuig nga tradisyon nga mao ang SANTACRUZAN. Unang bahin sa Kalihokan, mao ang pagrosaryo nga gipangulohan sa pinili nga mga bata nga nagsanina nga daw anghel. Ikaduhang Bahin mao ang mabulokon nga prosisyon sa mga rayna. Ang ikatulong bahin mao ang programa diin gipresentar ang mga rayna pinasubay sa kasaysayan sa ilang mga titulo. Misunod dayon ang pagpurong purong ni Rayna Elena sa Mahal nga Birhen Maria diin gikanta sab ang O Maria Rayna sa Pilipinas. Ang kinaulahiang bahin sa programa mao ang pagpanghatag sa mga awards, certificate, mga giveaways, ug pagpasalamat sa mga sponsor. Gitapos ang programa sa usa ka pagpanihapon.

Daku ang pasalamat sa mga GSLs nga nagmalampuson ang maong kalihokan tungod sa ilang pagpaningkamot nga mahimo kining halandumon para sa ilang mga kabataan. Dalaygon ang Mahal nga Birhen.

Viva Maria!

(Mary Grace Gonzales | OMPH Parish SoCCom)