Pagbag-o Sa Panaad

Pagpasidungog, pagpasalamat sa unang Dominggo sa Hunyo petsa 4 tuig 2023 niining duha ka balaanong panghitabo. Ang Santos nga Eukaristiya pinangulohan ni Fr. Dionisio Tabiliran, kura paroko sa St. Mary of the Perpetual Rosary Parish ug ang seremonyas sa Pagbag-o sa Panaad sa mga GKK Ministry Coordinators ug Miyembro sa Core Group sa Parokya. Ang mga magtotoo madasigon ug malipayon sa grasyang makasantos nga nadawat.

Nakapadugang usab ang homiliya ni Padre Diony nga ang Santisima Trinidad nagpaka-anaa sa kanunay uban sa dakong gugma, kahiusahan ug sa pagduyog sa pagkabalaan. Ang Amahang Langitnon, ang Ginoong Hesukristo ug ang Espiritu Santo nagkahiusa pagpalambo ug paglig-on sa atong buhing pagtoo. “No man is an island,” dili mabuhi ang tawo sa pag-inusara. Ang kaayo sa Ginoo gimugna ang Gasa sa Gagmay’ng Kristohanong Katilingban pinaagi sa matag pamilya, sa pagpakiglambigit sa katawhan sa Dios.

Mabungahon ang pamalandong ni Padre Diony mahitungod sa GKK: G-grounded in God K-ingdom values K-ingly service. Isip piniyalan, pinaagi sa pagpaningkamot ang buhat mahasubay sa kabubut-on sa Ginoo. Bangon! lihok sa pagserbisyo, ang tanan dinhi sa kalibutan lumalabay lamang, Diosnong kinabuhi walay utlanan.

Daghang salamat Ginoo nga imo kaming gitawag ug gipili nga buhing saksi sa pagbuhat ug pagsunod kanimo. Grasya sa Santisima Trinidad among masabtan sa pagka Misteryo dili matupngan! “O Dios sa Kahimayaan, Balaanong Tulo Ka Personas, kaloy-i kami.” (Maria Dexie Calvo | St. Mary of the Perpetual Rosary Parish GKK SoCCom)