Motubo diha sa Kaluoy ni Kristo

Ika-11 nga Domingo sa Ordinaryong Panahon (June 18, 2023)
Ex. 19:2-6 / Ps. 100:1-2, 3, 5 / Rom. 5:6-11 / Mt 9:36-10:8

Unsay atong mahunahunaan kon makadungog kita sa pulong nga kaluoy? Kung atong tan-awon sa diksiyonaryo, kini naghubit sa kalooy isip “mabinationg kaluoy ug kabalaka sa mga pag-antos o kaalautan sa uban.” Karon unsay mahitabo kon ato kining hisgotan sama sa kaluoy nga gipakita ni Kristo? Unsa kaha ang hitsura niana?

Nakita ni Hesus ang mga tawo nga gihasi ug walay mahimo. Naluoy Siya kanila, tungod kay sila naguol ug nawad-an sa espiritu sama sa mga karnero nga walay magbalantay. Giunsa pagpakita ni Hesus sa Iyang kalooy? Iyang gitubag ang ilang espirituhanon ug pisikal nga mga panginahanglan pinaagi sa pagsangyaw sa Maayong Balita ug pag-ayo kanila.

Sa unsang paagi kita motubo sama sa kaluoy ni Kristo? Pinaagi sa pagpaambit sa kalooy ni Hesus alang sa mga tawo ug pag-ampo alang sa dugang nga tabang sa Iyang kawsa. Ang modelo sa kalooy ni Jesus mao ang paghimo og mga disipulo nga mahimong ipadala sa Iyang ani. Kini nga mga disipulo usab dunay nagkalain-lain nga kinaiya nga gani sa atong tawhanon nga pagsabot dili takos nga mahimong sumusunod Niya. Apan ang kalooy sa Dios naghatag kanato ug higayon sa pagbag-o sa atong kaugalingon. Ang Iyang gugma ang muporma sa ato aron kita mamahimong bag-ong mga tawo.

Daghan ang anihon, apan diyutay ra ang mga mamumauo. Kini nga bersikulo parehas nga tinuod karon sama pud sa hitabo sa panahon ni Hesus. Tungod niini nga kahimtang, kita gidasig sa pagampo nga ang Ginoo manawag pa ug mga katawhan alang sa pagpalapnag sa kaayo sa kalibotan. Ug samtang ato kining buhaton, atong pangutan-on ang atong kaugalingon – Sa unsang paagi gusto ni Hesus nga atong ipakita ang atong kaluoy sa mga tawo sa atong palibut sama sa kaluoy nga Iyang gipakita? (Bro. Ignatius Gonzales, CFA)