Panaghiusa sulod sa 5 ka Dekada

Ang kaminyoon usa ka gasa sa bokasyon ug kini dunay duyog nga responsibilidad. Ang Genesis 2:24 nag-ingon, “tungod niini ang lalaki mobiya sa iyang amahan ug inahan ug motipon sa iyang asawa ug mausa sila.” Ang sakramento sa kaminyoon, maghiusa sa babaye’g lalake pinaagi sa Espiritu nga ibubo kanila. Susama niini nga panaghiusa, kita usab nahiusa sa Amahan, ug sa Anak ug sa Espiritu Santo pinaagi sa pagdawat sa balaang dugo ug lawas ni Kristo diha sa Santos nga Eyukaristiya.

Pipila sa mga managtiayon ang nagpabilin sa ilang mga saad, pipila usab ang wala na makalahutay. Bulahan kadtong nagpabilin luyo sa mga pagsulay ug kalisod nga mahiagoman. Apil na diri ang managtiayon nga sila Sam ug Inez Venus nga taga Sto. Nino South Cotabato.

Adlawng Biyernes, Hunyo 2, 2023 sila nagsaulog sa ilang ika-50 nga anibersaryo sa kaminyoon didto sa Parokya sa San Francisco de Asis, Tagakpan kung diin ang usa sa mga magbalantay ilang kamaguwangang anak nga si Reberendo Padre Dennis Venus nadistino.

Talagsaon nalang karon ang mga maka-abot sa ingun-aning angang sa ilang kaminyoon, kini tungod sa mga hagit sa relasyon og sa maayong panglawas. Kung pangutan-on ang managtiayon kung unsa ang ilang dili malimtan nga mga kasinatian sa ilang singkwenta ka tuig, tuod man lahi lahi ang ilang mga tubag apan dunay usa ka nagpabilin nga kamatuoran. Daw dili kumpleto ang ilang pagkinabuhi kung layo ang usag-usa. Dunay kasigurohan nga ilang mabati nga mas luwas sila sa peligro kung sila manag-uban sa kanunay.

Ang ilang panaghiusa ilang gipuy-an sulod niining mga katuigan. Tuod man dili mawala ang panagbingkil o panaglalis apan wala sila makahuna-huna diha sa panagbulag. Nakasentro ang ilang panag-uban diha sa grasya sa Ginoo. Makalingaw nga paminawon ang ilang mga tubag sa pangutana kon unsa ilang mahatag nga tambag sa ubang mga managtiayon.

Si Nanay Inez miingon dinha sa pagsalig ug pag-ampo sa gugma ug grasya sa Dios. Si Tatay Sam, konkretong mihatag ug tambag base sa iyang kasinatian nga ang mga bana kinahanglan gayod nga dunay klarong plano ug tumong dinha sa ilang kinabuhi isip Padre de pamilya. Dili ikalimod nga usa sa kanunayng hinungdan sa dili pagsinabtanay mao ang kawad-on. Dinhi niya gipasabot nga ang usa ka bana kinahanglan nga magmaisugon sa pagtagana alang sa iyang asawa og sa tibuok niyang pamilya.