Subayon ta ang Sinugdanan sa GKK

(Gihan-ay ni Most Rev. George B. Rimando, D.D.)
Ikatulong Bahin

Ang GKKs sa Pilipinas nagsugod sa pagtumaw human sa pagpahitabo sa Baticano II 1962-1965. Ang unang nagsugod og tukod sa GKKs mao ang Prelatura sa Tagum (1962-1980) nga karon Diyosis sa Tagum (1980-present). Kaniadto gilangkuban kini sa Probinsiya sa Davao del Norte ug Oriental. (Nasiak ang Diyosis sa Mati December 1984 gikan sa Diyosis sa Tagum 1980.)

Ang unang sinugdanan sa GKKs nahitabo sa tuig 1968. Apan human sa Minadanao-Sulu Pastoral Conference (MSPC) sa tuig 1971, ang nagkadaiyang Diyosis sa Mindanao nagpasiugda ug tukod sa GKKs sama sa Arkdiyosis sa Dabaw, Diyosis sa Digos, Kidapawan, Malaybalay ug uban pa.

Ang kasinatian sa pagtukod sa GKKs sa Mindanao nakapaaghat sa mga taga-Visayas ug Luzon sa pagtukod ug ilaha ilabina human sa Ikaduhang Konseho Plenario sa Pilipinas o PCP II sa tuig 1991. Sa katuigan 1980’s nay pipila sa Visayas ug Luzon ang nagsugod ug nagsustenar sa GKKs. Ang uban misunod human sa pagdasig sa PCP II nga ang GKK himoong prioridad duso Pastoral sa matag Diyosis.

Sa tinuod lang, ang Catholic Bishops’ Conference of the Philippines o CBCP  nagsugod ug hisgut-hisgot ug nalantaw sa GKK niadtong 1974 pa. Matag karon og unya nahisgutan kini sa ilang tapok. Sa PCP II ang diwa ug paghagit sa Baticano II opisyal nga gidawat sa simmbahan sa Pilipinas. Ang pagtukod sa GKKs, usa sa dakong bunga sa diwa sa Baticano II ug PCP II.

Sukad 1990’s daghang Diyosisis naningkamot sa pagtukod ug pagpalambo sa GKKs. Ang uban nagdamgo nga makapahitabo sila apan nagpabilin nga damgo pa. Ang pagsugod o implementasyon nagkulang.

Busa si Orlando Cardinal Quevedo, OMI naningkamot nga himoon ang usa ka komitiba ang GKK sa CBCP aron matutokan ang kasinatian, pagpakaylap ug pagsustenar sa mga nagtumaw nga GKKs. Nahitabo kini sa katuigan 2000s. Matag tulo ka tuig nagtapok ang mga delegado sa matag Diyosis. Opisyal kining gisugdan niadtong tuig 2005, ipadayon sa tuig 2008, 2011, 2013. Sunod tuig puhon, 2015 naay “National Gathering” ipahitabo sa tibuok Pilipinas.

Unsay hinungdan nga luyo sa hataas nga panahon, ang pagtukod ug pagpalambo sa GKKs medyo kulang?

Si Padre Amado Picardal, ang Executive Secretary sa CBCP- BEC Committee  makahatag ug lamdag niini kay naga adto siya sa mga Diyosisis sa tibuok Pilipinas nga nagsugod nga nagapalambo sa GKKs.

Adunay mga Diyosis nagsugod apan wala ka lupad kay gisugdan sa usa lamang ka prokya niini. Pagreshuffling sa mga pari, balik sa uno. Naa pud mga Diyosis nga nakalupad na pero na ‘crash’ kay ang ‘‘piloto’’ nabalhin na pud. Ang mipuli posibli wala kaayo kasinatian sa GKKs. Matud pa sa survey, ang dakong hinungdan mao nga naay mga kaparian nga nagduha-duha kung motuslob ba o dili sa pagtukod og GKKs. Hago ug gasto daw! Apan mas hago ug gasto siguro ang magdala og pamilya!

Apan ang bagyong Sendong, Pablo ilabina ang Yolanda nakapa amgo nga ang GKKs makatabang ilabina sa pagtubag sa panginahanglan sa mga biktima sa bagyo.

Luyo sa nilatid nga hamubo nga kasaysayan sa GKK sa Pilipinas, atong tutukan ang kasinatian sa subregion sa Davao, Digos, Tagum og Mati ( DADITAMA) sa sunod nga isyu.