Gugmang Dili Matukib

Solemnidad sa Santisima Trinidad (June 4, 2023)
Ex 34:4b-6, 8-9 / Dn 3:52, 53, 54, 55, 56 / 2 Cor 13:11-13 / Jn 3:16-18

Ang Domingo sa Solemnidad sa Santisima Trinidad mao ang pagsaulog sa kahiusahan sa Amahan, Anak ug Epiritu Santo. Tulo ka persona sa usa lamang ka Dios. Sayod kita nga ang misteryo sa Santisima Trinidad maoy labing taas nga misteryo sa atong pagtoo. Ang pagpadayag sa kahiusahan sa Santisima Trinidad usa ka tataw nga kamatuoran nga gitudlo sa atong Ginoo, si Jesukristo ang bugtong Anak sa Dios. Ang Dios nga nahigugma pag-ayo sa kalibutan nagpadala sa iyang Anak aron paghatag og kinabuhi niini ug dili sa paglaglag sa kalibutan. Si Jesus nga gikan sa langit maoy nagpaila sa Amahan. Si San Mateo miingon man nga “walay nakaila sa Anak gawas sa Amahan ug walay nakaila sa Amahan gawas sa Anak.” Kini nga kamatuoran madawat lamang kon adunay pagtoo. Ang pagtoo maoy maghatod ngadto sa pag-ila sa kinahiladmang bahin sa Dios nga dili maabot sa atong kaugalingong mga pagsabot ug panghunahuna.

Ang naghingapin nga gugma sa Diyos maoy hinungdan aron ang Anak sa Dios makig-ambit sa atong tawhanong kinaiya. Ang Dios mipadayag sa iyang dakong gugma pinaagi sa pagpakatawo sa iyang bugtong Anak, ug tungod niini siya nag-antus, namatay ug nabanhaw ug karon nagalingkod sa tuo sa Amahan. Si San Gregorio nag-ingon “Ang pagpakita sa matuod nga gugma mao ang pagpakita niini diha sa buhat.” Ang buhat sa atong Ginoo mao ang buhat sa gugma, siya nga nahigugma sa Amahan nagbuhat sa kabubut-on sa Amahan.

Sa katapusan, kita nga mga disipulo ni Kristo magbuhat usab sa ingon. Kita giawhag sa pagsunod sa mga lakang sa atong Ginoo nga mao ang pagbuhat sa kabubut-on sa Amahan. Atong ipaambit ang kinaiya nga diosnon pinaagi sa atong mga buhat, ang buhat nga makapahimoot sa Dios. Ang buhat nga maoy makapasulod kanato sa gingharian sa Dios didto sa langit. Maningkamot kita sa pagpakaylap sa dakong gugma sa Dios ngadto sa atong isigkaingon. Maingon nga kita matuod nga nahigugma sa Dios naghimo sa iyang mga kasugoan. (Rev. Soren Abellanosa)