Walay Puas Nga Pagpasalamat

Malipayon ug malampusong gisa-ulog ang ika-24 nga kapistahan sa parokya ni San Isidro Labrador sa Catalunan Grande ubos sa tema nga, “Ang katilingban ni San Isidro Labrador nagkahiusa nga naglawig padulong sa Amahan.” Dako ang Pasalamat sa Kura Paroko nga si Rev. Fr. Maximo Bahinting uban ang mga opisyales sa Parish Pastoral Council, mga Coordinator sa mga Ministriya kinsa mao gayud ang nangulo sa pagpangandam sa mga kalihukan sa kapistahan.

Niadtong milabayng bulan sa Marso gisugdan ang usa sa mga kalihukan agi ug pagpangandam sa kapistahan pinaagi sa nabatasan sa parokya o ang tradisyon sa PANAW-DUAW pinaguluhan sa SILP Formation Team diin ang Patron sa Parokya si San Isidro Labrador molibot sa tanan niyang sakop nga GKK diin adunay pagahimuong pormasyon. Sa niaging tuig ang pormasyon nga gihatag mao ang pagedukar kung unsa gayud kining Halad Pasalamat o Stewardhip, apan sa karon nga tuig tungod sa mapadayonon nga pormasyon, nakasabot ug nihamtong na sa paghatag sa HALAD PASALAMAT ang mga parokyano ni San Isidro Labrador.

Ang Formation Team sa Parokya naka decidar nga maghatag nalang ug AVP nga adunay mga testimonya sa indibidual, magtiayon, pamilya ug katilingban sa ilang paghatag sa ilang Halad Pasalamat.

Sa Laing bahin agi ug pagpalig-on sa Ministriya sa mga Batan-on, si Fr. Max nagmugna usab ug SPORTS FEST (basketball ug badminton) alang sa mga batan-on ug kini pormal nga gipaga-abrihan niadtong Abril 15, 2023 ug gipagatambongan sa mga GSL ug mga players sa lima ka sona nga nag langkob sa mga GKK sa parokya. Nahimong mananaog sa basketball ug Badminton mao ang sona 5.

Malipayon ug mapasalamaton kaayo ang Parish Youth Apostolate Core Team sa suporta nga gihatag ug gipadayag kanila. Sa hinay-hinay nabalik na usab ang mga kalihokan kaniadto sa wala pay pandemya usa na dha ang Procession ni San Isidro ug ang Fellowship Lunch kung asa sadya kayo nga gisalmutan sa mga GSL sa lima ka sona. Kini gipahigayon sa adlaw sa pista pagkahuman sa Pontifical Mass nga gipanguluhan sa atong halangdong Arsobispo Sa Davao, Most Rev. Romulo G. Valles, DD.

Sa katapusan ang mga hiyas ni San Isidro Labrador tinuod gayud nga ato na nga napuy-an isip iyang mga parokyano. Ang pagkamanggihatagon, maampoon, ug ang pagkamapasalamaton, maong kami walay puas nga pagpasalamat alang sa tanan nga mitabang, tanang mihatag sa ilang pagsuporta pinansyal, emosyonal, ug espiritual, kamo gayud ang naka pahimo nga nagmalampuson ang atong pagsaulog sa atong kapistahan hinaut nga kini nakapahimuot sa atong patron ug labi na gayud sa atong Nabanhaw nga Ginoo. Viva San Isidro Labrador! (Jerick Nacion | SILP Worship Ministry Coordinator)