Mga Instrumento sa Kalinaw

Duha ka mga bata ang gibunyagan atul sa ika-19 nga kapistahan sa GKK Queen of Peace, Bangkal, Davao City, ubos sa Our Lady of Lourdes Parish, niadtong 13 sa Mayo 2023.

Ang bunyag gipatigayon sulod sa Santos nga Misa nga giapilan sa mga miyembro sa GKK nga nagsugod sa alas syete y media sa buntag nga gipanguluhan ni Fr. Fernando “Anggong” Ingente, SM.

Sa iyang homilya, si Fr. Anggong nagpasalamat sa tibuok katilingban sa makanunayong pagsalmot sa mga kalihukan sa simbahan pinaagi sa suporta nga ginahatag sa GKK Queen of Peace.

Matud pa niya “ang gusto ni Maria sa matag usa kanato, kita mamahimong instrumento sa kalinaw.” Siya nanghinaut nga ang GKK Queen of Peace magdalag kalinaw sa matag tawo, matag pamilya, ug ngadto sa tibuok katilingban alang sa gipangandoy nga kahiusahan.

Dako usab ang pasalamat sa GKK Queen of Peace sa suporta nga gihatag ni Ana Norbe, Head Catechist sa OLLP sa iyang pagduyog sa Santos nga Misa ug sa mga niaging novena mass.

Human sa misa, gibendisyunan ni Fr. Anggong ang pagkaon nga giandam sa katilingban nga gisalu-saluhan sa tanan.

Malipayong pagsaulog sa ika-19 ka tuig nga kapistahan sa GKK Queen of Peace! Dalha ang kalinaw ni Kristo diha sa inyong kaugalingon, sa inyong matag pamilya aron ang atong katilingban makahiagum sa kalinaw ug kahiusahan nga ginahandum.

Viva Maria! Viva Hesus!

(Rowena Baldoza-Villaflor, OLLP SoCCom)