Sumbanan Sa Pagtoo Ug Pagkapiniyalan

Taliwala sa mga pagsulay ug hagit sa kinaiyahan, malipayon ug malampusong gisaulog ang ika-28 nga Kapistahan sa Mahal nga Patron, Sr. San Jose Nga Mamumuo sa GKK Jade Valley, Tigatto, Zone 8 nga nahisakop sa St. Mary of the Perpetual Rosary Parish nga adunay tema, “Sr. San Jose nga Mamumuo, ang among buotang Patron nga Modelo ug Sumbanan sa Pagtoo ug Maayong Piniyalan sa among Ginoo.”

Aron makahuloganon ang kasaulogan sa kapistahan gisugdan ang pagpangandam sa pagpahigayon og hiniusang pag-ampo, pagnovena ug prosesyon diin pinaagi niining mga kalihukan nahiusa ang mga GKK Servant Leaders (GSL), Tigpasayon sa Pundok Banay (TPB) ug mga miyembro sa pagpadangat sa mga pangaliya ngadto sa Dios pinaagi kang Sr. San Jose.

Ang kasaulogan sa Santos nga Misa alang sa kapistahan gipahigayon niadtong May 1, 2023 sa alas 6:00 sa buntag sa kapilya nga gipangulohan sa Kura Paroko, Fr. Dionisio Tabiliran.

Adunay simple nga pagsalo-salo nga gipaambit alang sa mga bisita ug sa mga kasilinganang GKKs nga niduyog ug mitambong sa Santos nga Misa, mga makalipay ug makalingaw nga pinaabtik na pasundayag sa mga GSL, TBP ug mga kabatan-onan inubanan sa mga kasilinganang GKKs.

Tungod sa maayong panig-ingnan ug pinaagi sa mga hiyas ni Sr. San Jose nga maoy sumbanan sa pagtoo ug pagkamaayong piniyalan, ang mga miyembro ug mga pangulo, nagmalahutayon ug nagkahiusa sa kadasig sa pagkamanggihatagon sa ilang mga talento, panahon ug bahandi. (Godoberta Pecolados, SMPRP GKK SoCCom | Photos by Jojo Torres Macadagat)