Ika-30 nga Pista sa GKK Sta. Cruz, sadya

Uban sa tema nga “Krus, Timaan sa Kadaugan Gikan Sa Kamatayon” gisaulog sa GKK Sta. Cruz NHA Buhangin ang ilang ika katloan (30) ka tuig nga kapistahan May 7, 2023. Nagsugod ang pag-novena niadtong Abril 27, 2023, kada alas sais y medya (6:30) sa gabii sunod ang Kasaulogan sa Pulong (KSP) diin karong tuiga adunay usa (1) ka sharer gikan sa katilingban nga gitugotan sa parokya nga mopaambit, ug inig kahuman ang PSL muhatag na sa iyang pamalandong. Sponsor sa kada novena ang pito (7) ka sona sa GKK ug ang NHA Homeowners, Women’s, Seniors, Manhatud, Naholip ug ang Mortuary Program. Ang prusisyon gihimo sa May 5, 2023, sa alas kuwatro (4:00) sa hapon libot sa main road sa NHA.

Ang Fiesta mass nga gipangulohan ni Fr. Gary Alvarado, CsSr, gihimo sa alas syete (7:00) sa buntag pagka Mayo 6, 2023. Matapos ang homiliya gisunod ang pagbunyag sa walo (8) ka mga bata. Naay kalahian tungod usa (1) lang ang gamayng bata nga gibunyagan kasagaran dagko na ug mobaktas-baktas na gani samtang ginahimo ang seremonyas sa pagbunyag.

Diha usab sa maong Misa gipasalamatan ang mga sponsors and donors sa tanang mga tabang pinansyal ug in kinds para sa kapilya. Gihatag usab ang financial report ug gipasabot ngano restricted ang Alay Kapwa nga pondo sa cash kay kini gamiton lang gayud sa mga kalamidad sa among lugar o sa mga kaubanan nga GKK nga sakop sa parokya. Daghan ang mipadayag sa ilang kahimoot nga gipagawas ang maong report, nag-ampo ang mga GKK Servant Leaders (GSL) nga pinaagi niadto aduna pay daghan nga mohatag ug motambong sa mga kalihukan sa GKK aron makab-ot ang mga umaabot pa nga mga proyekto niini sama sa maayong sound system. Human sa Santos nga Misa nangaon usa ug “lugaw” ang mga nanimba, sponsor kini sa Homeowners. Lingaw nga ang mga mangaging tawo o trisikad parahon sa para pakaonon ug lugaw nga lamian. Salamat Ginoo sa maong grasya!

Pagkagabii sa May 6, 2023 mao ang raffle draw sa Mortuary Program tickets ug ang “search for Mutya ng NHA Buhangin”. Daghang mga tawo ang nanambong sa maong search. Nindot ang mga dekorasyon, mga lights and sounds ug mga beauty and brains nga mga kandidata kada sona. Migawas nga mananaog ang Mutya sa Zone 5, Zone 4 ug Zone 6.

Mayo 7, 2023 adlaw sa pyesta, daghang mga schedule sa pagbendita sa mga panimalay gikan sa alas otso (8:00) sa buntag hangtud sa alas onse y medya (11:30) sa buntag. Dili pa gyud pareho sa mga tuig nga wala pay pandemic ang gidaghanon sa mga namista apan maayo na lang kini kay sa mga milabay nga tuig nga wala gyud mi nagkita alang sa pagsaulog sa pyesta kondili nagpamisa na lang mi ug mitan-aw sa FB live alang sa pahinungod sa maong kapistahan.

Damgo ug plano nga sa mosunod nga kapistahan diha na sa kapilya magdungan ug kaon ang mga nanimba sa Fiesta Mass kauban ang among Pari ug Parish Staff. Pagdayeg ug Pasalamat kanimo Ginoo ug sa among debosyon sa Sta. Cruz! (Marieta V. Comighud | Our Mother of Perpetual Help Parish GKK SoCCom)