Halad Kang Maria

Bulan sa Mayo, mao ang paghimo sa tradisyon sa FLORES DE MAYO (FDM) kon Mga Bulak sa Mayo isip Halad Kang Maria. Kini nga kalihukan pagahimoon sa tibook bulan sa Mayo diin giapilan sa mga Kabataan sa matag GKK, pinaagi sa mga Katekista ug ubang mga GKK Servant Leaders.

Gipahigayon ang FDM Launching sa St. Mary of the Perpetual Rosary Parish niadtong April 30, 2023 sa alas tres y medya sa hapon pinaagi sa Santos nga Misa nga gipangulohan ni Rev. Fr. Dionisio C. Tabiliran, Kura Paroko.

Ang mga Kabataan nga misalmot sa FDM nagagikan sa matag GKK sa napulo ka sona nga sakop sa St. Mary of the Perpetual Rosary Parish inubanan sa ilang maabtikon ug maalagarong mga Katekista nga gipangulohan sa Head Catechist, Sis. Dionisia Daquibig Devera.

Kining maong kalihukan atol usab sa pagsaulog sa 4th Sunday of Easter, Good Shepherd Sunday o Dominggo sa Maayong Magbalantay ug World Day of Prayer for Vocations, diin mamahimo unta kini nga giya sa mga kabataan nga magtubo ilawom sa mga pagtulon-an gikan sa Maayong Magbalantay ug mamahimong mga tinuod nga sumusunod ni Kristo ug inspirasyon sa pagpili sa ilang bokasyon sa umaabot nga panahon. Pinaagi niini masinati nila ang kinabuhi sa Mahal nga Birheng Maria isip atong Inahan. AVE MARIA! (Richie B. Lubon | St. Mary of the Perpetual Rosary Parish, GKK SoCCom)