Dili Tanang Hamtong Walay Kapasidad Sa Gimbuhaton

Adlawng Sabado, pitsa 29 sa Abril niining tuig 2023, gihimo ang panagtapok sa mga representatante sa Social Communications Committee gikan sa nagkalain-laing parokya sulod sa Arkidayosis sa Dabaw. Gitapok ang maong mga representate alang sa usa ka Writeshop o seminar sa pagpaambit sa mga paagi sa pagsulat ug mga balita. Kini pinaagi ug pinasikad diha sa panguna sa Davao Catholic Herald. Ang maong panagtigum usa ka gasa ngadto sa tanang mitambong nga mga Parish SoCCom tungod kay libre kini. Mabungahon ang panagtapok gumikan sa presensya sa halangdong mamumulong nga mao si Rowena Chavez Nuera, usa ka banggiitan nga magtutodlo ug manunulat sa nagka dakong Davao Catholic Herald.

Ang naa makita sa litrato, usa ka yanong tawo ug aktibong leader sa kalihukan. Ang iyang pangidaron, dili babag sa pagpaambit sa talento, oras ug bahandi. Amindao si Clinita Nartea nga dili sayon para sa iyaha nga moapail sama niining maong kalihukan tungod dili siya kabalo mugamit sa mga bag-ong teknolohiya karong panahona. Ug matod niya, wala siya magdahum nga sa iyang pangidaron, naapil siya sa maong kalihukan. Ug gani siya naningkamot nga maka-kat-on pa ug daghan aron sa pagtabang sa katawhan nga pwede niyang mahimo. Dako niyang pasalamat tungod sa iyang pag-apil niining ministriyaha tungod aduna siyay daghang nahibal-an ug proud siya nga member sa Social Communications Committee. Padayon siya sa pakigbisog alang sa iyang mamahimong kontribusyon sa katilingban bisan pa man sa iyang pagka hamtong. Siya unta mamahimong inspirasyon ngadto sa uban. (JB Berdera)