Pagpalambo Sa Kahanas

Usa ka Writeshop kon Writers’ Workshop para sa SoCCom sa kada parokya kansang tumong mao ang pagpalambo sa tagsa-tagsa ka abilidad sa mga partisepante gipahigayun sa Archdiocesan Commision on Social Communications didto sa San Pablo Parish Juna Subdivision, Matina Davao City niadtong April 29, 2023.

Ang maong programa gisugdan pinaagi sa pagpasabot gikan ni Ms. Christine Mae Camus kon unsay tumong niing maong seminar ug sa pagpaila-ila sa mga parokyang mipartisepar, ingon man ang pagpaila-ila sa speaker nga si Ms. Rowena Chavez Nuera nga mipaambit sa iyang mga kaagi sa pagpanerbisyo sa simbahan isip usa ka writer ug editor sulod sa 35 katuig. Sa iyang unang diskasyon, iyang gihatagan ug pagtagad ang pagpasabot kung unsa ang angay nga makita sa usa ka artikulo, apil na ang angayan nga isulat sulod niini. Human sa iyang mubong diskasyon, siya mihatag ug higayon sa 26 ka mga partisipante nga musulat sa ilang kaugalingong artikulo mahitungod sa writeshop nga kasamtangang gipahigayon ug nga kini himuon sulod sa usa ka oras.

Ang writeshop seminar nga giapahigayon nagsilbing dakong oppurtunidad sa mga hamtong ug batan-on nga SoCCom. Makatabang kini alang sa mga partisipante nga mapaambit ang ilang talento ug abilidad sa pagsulat ingon man ang higayon nga maabli ang ilang hunahuna sa mga butang nga nakutlo niining maong workshop. Kini usa usab ka dakong tabang sa pagpalambo sa kahanas ug abilidad sa pagsulat ug usa ka artikulo. Sama sa mga artikulo nga isumiti sa Davao Catholic Herald, artikulo nga maghatag sa sakto ug direktang impormasyon ilabina sa panahon karon nga daghan ang nagkatag nga mga dili saktong impormasyon dili lamang sa katilingban sa simbahan kundili sa katilingban. (Arra Sumampong and Lycell Batobato)