Halad Pasalamat

PANAMILIT – usa ka pulong nga dili malikayan tungod kay walay permanente niining kalibutana. Bation gyud nato ang kalipay, kagool ug uban pa nga mga emosyon. Apan, alang nila Fr. Crispin Mostajos, Fr. Froilem Bonn Barretto, ug Fr. Joey V. Trillo, nagmapasalamaton sila kaayo sa tanang parokyano nga mihatag sa ilang panahon, talento ug bahandi alang sa halad pasalamat sa ilang Farewell Party nga nahitabo atong Abril 21,2023 Byernes sa gabie sa Satmi Gym, Redemptorist Parish.

Gisugdan kini ug panihapon ug gisunod dayon ang mga nagkalain-laing pasundayag ug mga mensahe gikan sa nagkalain-laing sona sa mga GKK servant leaders (GSL) ug uban pang mga ministriya sa Parish Pastoral Council.

Nagpahinungod ug kanta nga “My love will see you through” ang Singing Priest nga si Fr. Bonn samtang ang mga tawo nagpaambit sa ilang mga gasa diha kanila. Mihatag sad ug farewell message ang kura paroko nga si Fr. Cris ug sumala kaniya, sa tanan Redemptorist Church nga iyang gialagaran, sa Redemptorist-Davao lang siya kakita ug pinakaaktibo nga lideres nga naghatag sa ilang TIME, TALENT ug TREASURE.

Human sa mensahe ni Fr. Cris, iyang gipaila-ila ang mupuli kaniya isip Kura Paroko nga mao si Rev. Fr. Cruzito Manding CSsR ug bagohan lang nahitabo nga napili sab siya isip Provincial Vicar sa Redemptorist of Cebu.

Sa ngalan sa mga parokyano sa Inahan sa Kanunay’ng Panabang, mapasalamaton ang tanan sa Redemptorist Fathers sa ilang makanunayong suporta sa mga programa sa mga Gagmay’ng Kristohanong Katilingban (GKK) ug nanghinaut sa ilang maayong paglakaw sa ilang bag-ong misyon ug kanunay nga panalangin sa Dios. (Mary Grace Gonzales | OMPH Soccom)