Salig diha Kaniya

Ika-5 Domingo sa Pasko sa Pagkabanhaw (May 7, 2023)
Acts 6:1-7 / Ps. 33:1-2, 4-5, 18-19 / 1 Pt. 2:4-9 / Jn. 14:1-12

Si Jesus miingon sa iyang mga tinun-an: “Ayaw kamog kaguol. Salig kamo sa Dios ug salig usab kanako.”

Ang pagsalig nagsukad sa pakig-estorya sa Dios kanato, ug sa dihadiha kita mangita sa Iyang tingog, ug sa hinay-hinay kita pud magsugod sa pagtubag. Ang Dios mao ang una nga molihok pinaagi sa pagtanyag kanato ug usa ka imbitasyon. Ang atong tubag sa imbitasyon gikinahanglan ug 100% nga tubag. Busa, ang pagsalig dili makab-ot kung walay hingpit nga kooperasyon og paningkamot tali kanato ug sa Dios.

Sa dihang kitang mga tawo makasinati og mga kalisdanan sa atong mga kinabuhi, kinahanglan natong ablihan ang atong mga dalunggan aron maminaw sa malumo nga tingog sa Dios. Ang kamatuoran nga ang katawhan mihimo sa pagpili sa pagtugyan sa ilang kaugalingon ngadto sa Dios taliwala sa mga pagsulay. Niini nga sitwasyon, ang kasakit ug pag-antus sa tinuod adunay epekto sa pagtuboy sa pagpili sa lawom nga pagsalig ngadto sa kahitas-an.

Ang pag-antos nga giatubang sa usa ka tawo mausab tungod sa grasya. Busa, importante nga masabtan nato nga ang mga pagsulay sa kinabuhi nagtanyag kanato og talagsaong mga oportunidad alang sa pagkabalaan. Kung mopili kita sa pagtugyan sa atong kaugalingon ngadto sa Dios tungod sa pipila ka kasinatian sa pag-antus, Nan! adunay dakong bili niana nga pagpili tungod kay gidapit kita sa pagbuntog sa kaluoy sa kaugalingon, kahakog ug kasakit.

Ang tinuod nga pangutana nga angay pamalandongan dili mao ang daghang ipangutana nato sa Dios; hinoon, ang pangutana kung andam ba kita nga mohatag sa atong kauglingon ngadto sa Dios bisan paman wala pa nato mahibal-i kung unsa ang Iyang pangayoon kanato. Ang solusyon niini, simple lamang mao ang atong pagsalig sa Dios. Apan ang pangutana igo ba ang atong pagsalig sa Diyos? Ug kon, sa sinugdan, ang Iyang malumo nga pagdapit dili makatarunganon, andam ba kitang modawat sa Iyang kabubut-on ug moingon kada adlaw ug “OO.” Alang sa tawo nga motugyan sa tanan, labi na kung maayo ang kinabuhi, ang kaugmaon mahimong labi ka bulahan sa labi ka maayo nga paagi. Tingali dili sa kalibutanon nga paagi, apan sigurado sa labi ka maayo nga paagi tungod kay kini mamunga sa maayong bunga nga naggikan sa usa ka kinabuhi nga puno sa kaabunda sa grasya.

Ang importante nga punto nga makuha gikan niini, mao nga bisan pa kon ang atong kinabuhi napuno sa pag-antus, maayo, o anaa sa tunga-tunga, unta ato gihapon itugyan ang atong kaugalingon ngadto sa Dios. Bisan paman asa nato makit-an ang atong kaugalingon, aduna gihapon kini dakong bili sa pagtubag sa imbitasyon sa Dios nga itugyan ang atong kinabuhi ngadto Kaniya ug sa pagdawat sa Iyang labing balaan nga kabubut-on. (Bro. Ranie Boy Pamplona)