Abante mga kabatan-onan sa pagsangyaw

MATI CITY –  Usa ka libo ka mga batan-ong babaye ug lalaki nga sakop sa Diocesan Youth Apostolate (DYA) gikan sa tanang 19 ka mga parokya sa Diyosesis sa Mati ang nagtapok alang sa ilahang tinuig ug ika-13 nga Diocesan Youth Convention didto sa host parish nga mao ang Simbahan ni San Francisco Javier, Sigaboy, Governor Generoso, ug ang host school sa mao usab nga lungsod—ang Maryknoll High School of Sigaboy, Abril 30-Mayo 3, 2014.

Ang upat ka adlaw nga kalihokan ang nagdala sa tema nga “Go and make disciples of all nations” –(“Panlakaw kamo ngadto sa tanang katawhan sa tibuok kalibutan ug himoa sila nga akong mga tinun-an”) (Mt. 28:19); ang tema usab kini sa kanhi ika-28 nga World Youth Day sa Rio de Janeiro, Brazil sa miaging Hulyo 2013.

Gibuksan ang youth convention alas 3:00 sa hapon sa Abril 30 pinaagi sa Welcome Mass ni Obispo Patricio Alo, kinsa misubli sa diwa sa tema nga, matud pa, “gikinahanglan nga ang tanan ang maningkamot gayod aron masangyaw ang maayong balita aron ma-angkon usab ang kaluwasan diha kang Jesukristo, labi na kamong mga kabatan-onan nga kinahanglang mag-maisugon sa pag-abante sa katilingban, sa modernong kalibutan, aron isangyaw ang Maayong Balita.”

Misunod ang taas nga parada palibot sa lungsod nga gisalmutan sa mga youth, dala-dala ang nagkadaiyang mga DYA parish banners, gikan Boston sa East Coast hangtud usab sa kinatumyang lungsod sa Gulf Town, ang Banaybanay, ug human sa panihapon, gipahigayon ang Welcome Program nga giandam sa parish DYA.

Ang misunod nga mga adlaw naglakip og input sa Climate Change Adaptation nga giprisintar ni Dra Gemma Narisma gikan sa Manila Observatory—human usab sa iyang pagpakigpulong sa Cateel, Baganga ug Lupon; mga duwa sa bola, usa ka literary contest sa mga coro ug sayaw, ug ang katapusang gabii sa Search  & Coronation Night ug Awarding Ceremony; kining tanan “sa tumong nga ikaduso pa ang maayo ug responsableng panig-ingnan nga mahatag sa mga kabatan-onan ngadto sa ilahang isigka-ingon, lakip sa mga butang sa klima, partikular mga disaster sama sa nasinati sa paghapak sa Super-typhoon Pablo,” sulti ni Diocesan Coordinator Michelle Masucol sa pakighinabi sa media.

Magarbuhon usab ang bikaryato sa San Salvador del Mundo sa Caraga, Manay, San Ignacio, ug Tarragona, sa ilahang pagkaplag sa overall championship, gani Grand Slam atol sa 3-consecutive year champion! Ikaduha ang Holy Family Vicariate nga nakabase sa Mati, ikatulo ang St. Vincent Ferrer sa Lupon kon asa usab naggikan ang Miss DYA nga si Rachel Barol, ug ikaupat ang St.James the Apostle Vicariate sa Cateel ug member parishes.

Si Fr. George Cajes, Jr., ang Diocesan Youth Director sa DYA, sa ngalan sa steering committee, ang miluwat og mga pulong sa pagpasalamat sa tanan nga nahimong kabahin sa kalampusan sa  convention sa kahugpungan sa kabatan-onan karong tuiga, labi na sa dakong kooperasyon sa mga kura paroko ug parish youth coordinators nga “hinaut moabante gayud sa madasigong pagsangyaw”!