Ang Domingo sa Kalooy: Dakong kahigayonan sa Pakighiuli

Atol sa paghandom sa kasakit, kamatayon ug pagkabanhaw ni HesuKristo, gisugdan na ang nobena alang sa Kapistahan sa Diyosnong Kalooy niadtong Biyernes Santo.

Samtang nangandam ang Kristohanong katawhan sa Kasaulogan sa Domingo sa Diyosnong Kalooy mahinungdanon nga balikan ang kahulogan ug makasaysayon nga kahulogan sa maong adlaw.

Sa ikaduhang Domingo sa Pasko sa Pagkabanhaw sa Jubilee Year 2000, atol sa Misa sa Canonization ni Sta. Faustina Kowalska, gideklara ni anhing Santo Papa Juan Pablo II ang Domingo human sa Pasko sa Pagkabanhaw nga tawgon ug “Divine Mercy Sunday.”

Si Sta. Faustina Kowalska usa ka madre nga gikan sa Poland kinsa nakadawat ug panan-awon gikan kang Hesus, lakip na sa nagsul-ob ug puti nga sapot nga dunay mga rayos nga pula ug puti nga naggikan sa iyang dughan nga nahimong inila isip imahe sa Diyosnong Kalooy kon Divine Mercy.

Gisulat ni Sta. Faustina sa iyang diary nga nakigsulti kaniya si Hesus, “Buot nako nga ang Imahe solemne nga mabendisyonan atol sa unang Domingo human sa Pasko sa Pagkabanhaw ug buot nako nga simbahon sa publiko aron nga ang matag kalag mahibalo niini.

Akong anak, ipahibalo sa tibuok kalibutan kalabot sa dili matugkad nga kalooy.

Buot nako nga ang Kapistahan sa Kalooy maoy dangpanan ug pasilungan alang sa tanan ilabi na sa mga makaluluoy nga mga makasasala.

Akong ibubu ang tibuok lawod sa mga grasya sa mga kalag kinsa moduol sa tinubdan sa akong Kalooy.”

Base sa panan-awon, kadtong nakapangalawat ug mitambong sa Sakramento sa Pakiguli, atol sa Kapistahan sa Kalooy, makadawat ug hingpit nga kapasayloan sa mga sala.

Gipasabot ni anhing Santo Papa Juan Pablo II ang kamahinungdanon sa imahe sa Divine Mercy sa iyang homiliya atol sa canonization ni Santa Faustina: ” gikan sa Kasingkasing (ni Kristo) si Sr. Faustina Kowalska, ang bulahan kinsa gikan karon tawagon nga usa ka SANTO, makakita ug duha ka rayos sa hayag gikan sa kasingkasing ug naghatag ug kahayag sa kalibutan.”

“Ang duha ka rayos ”, si Hesus mismo ang nagpasabot kaniya usa ka adlaw niana,” nag representar sa dugo ug tubig” (Diary, entry 299).

Ang dugo ug tubig!

Kon atong balikan, atol sa Biyernes Santo, kahinumduman diha sa testimonya nga gisulat ni San Juan, nga sa dihang usa ka sundalo sa bungtod sa Kalabera ang miduslak sa kilid ni Hesus, mibuhagay ang dugo ug tubig gikan niini (John 19:34).

Nagtutuk ang Domingo sa Diyosnong Kalooy sa gasa sa kalooy ug gugma nga gihatag pinaagi sa kamatayon, paglubong ug pagkabanhaw ni Kristo. Sama sa giingon ni anhing Santo Papa Juan Pablo II, “Divine Mercy reaches human beings through the heart of Christ crucified.”

Matud pa ni Fr. Thomas Hoisington usa ka Amerikano nga pari, sa iyang sinulat nga Bulahan kadtong kinsa sa iyang dakong kalooy naghatag kanato ug bag-ong kinabuhi o pagkahimugso.

Iyang gihatagan ug gimbug-aton ang panawagan sa simbahan alang sa Solemnidad sa Diyosnong Kalooy sa pagmaya nga ang Sakramento sa Pakiguli, ug ang kalinaw nga nagdagayday gikan niini, mao ang labing unang mga bunga sa pagkabanhaw ni HesuKristo.

Daghan sa mga natibulaag nga mga kaigsoonan nag-kwestyon sa sakramento sa pagpangumpisal ngadto sa pari apan gibarugan sa mga pulong ni San Juan nga magsasangyaw nga nag-ingon, human sa pipila ka oras gikan sa pagkabanhaw ni Hesus, nagpakita Siya ngadto sa mga apostoles, gibugahan sila ug miingon, “Dawata ang Balaang Espiritu. Kadtong mga sala nga inyong pasayloon, gipasaylo, ug katong mga sala nga pagahuptan, magpabilin. “

Espirituhanong Pagpangandam

Bisan sa mga pulong ni Hesus ngadto kang Sta. Faustina kalabot sa paningahanglan nga magmaluluy-on, nagkanayon:

Yes, the first Sunday after Easter is the Feast of Mercy, but there must also be acts of mercy. “I demand from you deeds of mercy, which are to arise out of love for Me. You are to show mercy to your neighbors always and everywhere. You must not shrink from this or try to excuse or absolve yourself from it (742).”

Busa, angayan lamang nga magsaulog sa Domingo sa Diyosnong Kalooy sa solemne nga pamaagi, ug gisugyot ang mosunod nga mga buhat: sinsero nga maghinulsul sa tanang mga sala; ibutang ang hingpit nga pagsalig ngadto kang Hesus; pagpangumpisal sa dili pa moabot ang kasaulogan sa Domingo sa Dyosnong Kalooy; sa pagpangalawat atol sa kapistahan; pagtahod sa Imahe sa Diyosnong Kalooy; pagkamaluluy-on ngadto sa uban pinaagi sa mga buhat, pulong ug mga pag-ampo sa ilang kabulahanan.

Naghatag ug plenarya ug partial nga mga indulhensiya si anhing Santo Papa Juan Pablo II pinaagi sa giluwatan nga dekreto niadtong Hunyo 2022 aron nga madasig ang katawhan sa debosyon sa Diyosnong Kalooy.

Diha sa maong dekreto, nagkanayon nga ang plenary indulgence mamahimong maangkon pinaagi sa pagbisita sa usa ka simbahan atol sa kapistahan sa Divine Mercy Sunday “inubanan sa Espiritu nga hingpit nga nalimpyohan nag ikan sa sala, bisan ang sala nga benyal, ug sa pagsalmot sa mga pag-ampo sa pagdayeg sa Diyosnong Kalooy.

Dugang pa, ang mga pag-ampo naglangkob sa mga debosyon sa pag-ampo sa divine mercy chaplet, eucharistic adoration, ug ang sakramento sa pakiguli.

Mamahimo usab nga mobisita sa Blessed Sacrament nga gipagawas o anaa sa tabernakulo, ug mag-ampo sa Amahan Namo, ang Nicene Creed, ug ang tim-os nga pag-ampo ngadto kang Kristo. Usa ka ehemplo niini nga gihatag sa maong Dekreto mao ang “Merciful Jesus, I trust in you!”

Gipahinumduman usab ang katawhan nga aron makadawat sa maong indolehensya, dunay tulo ka mga kondisyon: ang pagpangumplisal, pagpangalawat, ug pag-ampo sa mga intension sa Santo Papa.

Samtang mamahimong madawat ang duha ka mga sakramento sa usa ka adlaw, gitugutan sa simbahan nga madawat kini kutob sa 20 ka adlaw o human sa gitugutan nga adlaw sa indolehensiya.

Dili usab angayan mabalaka ang mga masakiton ug kadtong dili makahimo sa pag-adto sa simbahan nianang adlawa, mamahimo gihapon nga maangkon ang usa ka plenary indulgence.

Kinahanglan lamang nga dunay intension nga mangumpisal, mangalawat ug mag-ampo alang sa intension sa Santo Papa sa labing dali nga panahon, samtang mag-ampo sa Amahan Namo, Mitoo Ako (Nicene Creed) atubangan sa imahe ni Hesus. Dugang pa, kinahanglan nga mag-ampo sa usa ka tim-os nga pangilaba ngadto kang Kristo sama sa “Merciful Jesus, I trust in you.”

Ang kasaulogan sa Diyosnong Kalooy sa Arkidayosis sa Dabaw pagahimoon pinaagi sa Santos nga Misa nga pagapanguluhan ni Davao Archbishop Most Rev. Romulo G. Valles, D. D. sulod sa San Pedro Cathedral sa alas -3 ang takna sa hapon. Pagasundan kini sa usa ka prosisyon sa mga deboto sa Divine Mercy Apostolate.

Alang sa mga dili makahimo sa pagtambong, mamahimong maminaw sa DXGN 89.9 Spirit FM o mosaksi niini pinaagi sa official Facebook page sa DXGN 89.9 Spirit FM-Davao.