Ang Dalan Padulong Kang Kristo

Ang SEMANA SANTA gisaulog sugod sa Dominggo sa Pasyon nga naghandom sa pag-abot ni Kristo sa Herusalem ug matapos sa Dominggo sa Pagkabanhaw. Ang Semana Santa kinasing-kasing nga nagpahinumdum kanato sa maayo ug dakung buhat sa Diyos.

Niadtong Dominggo Abril 09,2023, nagmalapuson ang Parokya sa Inahan sa Kanunayng Panabang sa pagtapos sa Semana Santa 2023. Ubay-ubay ang mga katikaran sulod sa tibook semana. Giunahan kini ug kompisal sugod niadtong adlaw’ng Lunes Santo. Nagpahigayon ug Lenten Reflection niadtong adlaw’ng Miyerkules Santo ug ang mamumulong mao si Rev.Fr. Joey Trillo, CSsR diin iyang gipasiugda bahin sa pagka maayong karnero ug pagkapiniyalan.

Niadtong Huwebes Santo sa alas 5:30 sa hapon, gisaulog ang misa para sa pagsimba sa bulahan nga sakramento, ang ulahing panihapon sa Ginoo, ug ang paghugas sa mga tiil sa napulo’g duha ka mga apostoles. Sayo palang sa kadlawon sa Biyernes Santo alas 3 ang takna, gipahigayon ang Parish Wide Via Crucis nga gipangunahan sa mga kaparian dayon pagka Alas 3 sa hapon gipahigayon ang misa sa pagsaulog sa Pasyon sa Ginoo nga diin ang mga batan-on gipakita pinaagi sa drama ang pag-antus ug kamatayon ni Kristo sa Krus.

Miaging Sabado de Gloria sa alas 8 sa gabie, nagpahigayon ug Bendita sa kalayo ug gisaulog sab ang pagbag-o sa bunyag diin usa ka pamilyahan ang nabunyagan gikan sa laing sekta nga mibalik sa pagka-katoliko.

Ang kinaulahian nga gisaulog mao ang Pasko sa Pagkabanhaw niadtong Abril 9 sa alas 4:30 sa kadlawon nga gipangulohan ni Rev. Fr. Crispin Mostajo CSsR. Gisugdan kini ug tradisyonal nga SUGAT diin ang koro sa mga anghel miawit sa “Alleluia”. Gatosan ka mga deboto sulod ug gawas sa parokya ang misaksi sa maong sugat. Human sa seremonya sa sugat, gisunod dayon ang solemne nga misa sa pagkabanhaw ni Hesus.

Nagmalapuson ang maong kasaulogan tungod sa pagtambayayongay uban sa atong LGU, pwersa sa kapulisan ug kasundalohan alang sa hapsay ug malinawon nga selebrasyon, uban ang kinatibuk-an sa Parish Pastoral Council ug sa mga indibidwal nga way puas nga nagsuporta kanunay sa kalihokan sa atong simbahan.

Viva Hesus! Viva Maria!

(Mary Grace P. Gonzales | OMPH Soccom)