Ang Dignidad ug Misyon sa Mga Layko “Ganito Noon; Paano Ngayon?”

(Giandam ni Fr. Ronald Lunas)
Ikasiyam nga Bahin

9. Unsay basihanan sa misyon sa Layko?

a.         Ang tawag sa mga layko ngadto sa apostolado gihatag diha sa bunyag ug kompirmasyon, ug dili linahi nga mandato/sugo sa hirarkiya nga naglahi sa uban gikan sa kadaghanan alang sa particular nga pagpangalagad. Ang apostolado sa mga layko dili usab bunga sa panginahanglan o emerhensiya sama sa kakulang sa kaparian. Busa, makahisgot kta sa “apostolado sa mga layko”. Ang mga layko adunay batakang katungod nga mahimong kabahin sa apostolado sa Simbahan.

b. Atong amguhan nga ang Simbahan apostolikanhon. Kabahin sa pagsabot niining pagka-apostolikanhon mao ang pag-ambit niining maong katilingban sa misyon sa mga apostoles sa pagpakaylap sa maayong balita. Kining maong misyon wala lamang gibilin ngadto sa mga Obispo kondili sa tanang mga binunyagan. Ang pagka-apostoliko sa Simbahan wala lamang diha sa ordinado kondili sa tanang magtotoo.

10. Unsay kinaiya sa misyon sa mga layko?

a. Buhaon sa mga layko ang ilang katungdanan sa paging angay kanila. Mohimo sila niini isip mga sakop sa Simbahan (non-office bearers). Mosangyaw sila pinaagi sa pagsaksi sa ilang kinabuhi (LG 12). Labaw sa tanan, ilang aboton ang pagkabalaan diha sa ilang pagkaanaa sa kalibutan (AA 7).

b. Sa ilang gimbuhaton nga giyahan ang kalibutan ngadto sa kaluwasan diha ni Kristo, ang mga layko direktang nakiglambigit sa mga kalihukan sa kalibutan. Kining maong kinaiya sa pagka “kalibutanon” angay ug espesyal nga kinaiya sa mga layko (LG 31). Kini tungod ka yang mga layko anaa sa kinasang-an sa dalan sa kalibutan ug sa Simbahan, nianang bahin sa realidad nga harianon pa sa Dios. Niining paagiha, ang mga layko modala sa Simbahan ngadto sa kalibutan.

c.Sa usa ka bahin, ang mga layko mopuno sa kalibutan sa Espiritu ni Kristo. Pinaagi sa ilang edukasyon ug sa katakus nga nahuptan, ilang paningkamutan nga ang kalibutanong kalihukan mahatod ngadto ug mahimong kabahin sa plano sa Dios. Pinaagi sa ilang paningkamot, ang kalibutan mabalaan (LG 31). Sa laing bahin, ilang ipaabot ngadto sa Simbahan ang pangandoy ug pangutana sa kalibutan aron kini malamdagan sa Ebanghelyo. Ilang ihalad ang kalibutan ngadto sa Dios (LG 34) pinaagi sa ilang paningkamot alang sa Gingharian.