Nagpadayon sa Paglambo

Marso 19, 2023 – Ang GKK San Jose Esposo ni Maria sa Elenita Heights Subdivision Catalunan Grande, Davao City nagsaulog sa ilang ika-24th GKK Fiesta celebration inubanan sa tema nga: “San Jose, Amahan nga sumbanan sa katarong ug pagkamasinugtanon sa kabubut-on sa atong Langitnong Amahan.”

Ang kapistahan sa GKK San Jose Esposo ni Maria gisugdan ug Santos nga Misa sa alas nuebe sa buntag nga gipangulohan ni Most Rev. Romulo G. Valles, D.D, Arsobispo sa Dabaw. Ang mismong kura paroko sa Immaculate Conception Mintal nga si Rev. Fr. Johnny Autida anaa pud isip pagsuporta sa katilingban nga nahisakop sa maong parokya.

Niining maong adlawa usab ang 4th Sunday of Lent nga ginatawag nga Laetere Sunday. Sa homiliya gipaambit ni Archbishop Valles nga nalipay siya ug dako kay nakabalik siya pag usab sa maong katilingban. Nakita niya pag-usab ang paglambo sa maong katilingban tungod sa suporta nga gihatag sa mga miyembro niini. Gidayeg usab ni Archbishop Valles ang mga GSL o GKK Servant Leaders nga aktibong milihok aron mamahimong malampuson ang maong pagselebrar sa kapyestahan.

Ang maong GKK gidayeg sa atong Arsobispo kay adunay kaugalingong commentator ug lector, psalmist ug choir, altar servers ug mga giftbearers. Tungod niini makita ang aktibong partisipasyon sa matag miyembro.

“O San Jose, Ikaw ang among Patron, Panlabanan mo kami nga tanan.”

Sr. San Jose nga Esposo ni Maria, ig-ampo mo kami. (Ma. Deborah Kassandra Y. Cordova)