ASAC Davao Mipasiugda’g Pagbansay Sa Kalamidad

Ang Archdiocesan Social Action Center (ASAC) Davao nagpahigayon og trainors training mahitungod sa teyolohiya sa kabuhatan ug disaster preparedness niadtong Mayo 3, sa Ascension of the Lord Parish.

53 ka mga delegado gikan sa nagkalain-laing parokya sa Artsidiyosesis sa Dabaw ang mitambong sa training nga gihimo sulod sa Bishop Tonel Hall sa parokya didto sa GSIS Heights, Matina, Davao City.

Pinangulohan sa Director sa ASAC ug kura paroko sa Ascension of the Lord Parish nga si Fr. Leonardo Dublan, Jr., gihimo ang training diin si Manuel ‘Nonoy’ Rodriguez sa Immaculate Conception Parish, Mintal ang facilitator.

Gisaysay ni Rodriguez pinaagi sa simple ug yano nga paagi aron masabtan sa mga taga-Gagmay’ng Kristohanong Katilingban (GKK) ang teyolohiya ug spiritualidad bahin sa kabuhatan ug unsa ang angay buhaton sa tawo isip mga piniyalan sa kabuhatan diin siya nagpuyo ug nagdumala.

Usa sa mga nahisgutan sa maong trainors training ang paagi aron sa ginagmay nga paagi makatabang ang mga komunidad sa pag-adapt sa kasamtangan nga Climate Change o pag-usab sa dagan sa panahon.

Nahisgutan nga maski sa pag-menos sa paggamit sa kuryente, nakatabang na ang matag pamilya nga dili mulabaw ang epekto sa Climate Change. Giingnan usab sila nga mugamit og Fluorescent o LED lights nga mas gamay mokonsumo og kuryente apan mas hayag mo-siga kaysa sa ordinary nga bulb. Gi-awhag usab sila nga mogamit og energy-efficient appliances ug palungon ang suga o appliance kung walay mugamit.

Sa community level, gi-awhag ang mga mitambong nga i-identify ang kasamtangang mga practices sa ilahang GKK aron mu-adapt sa Climate Change ug unsa ang mga ginahimo nga paagi panahon nga adunay emergency o disaster nga mahitabo sa komunidad.

Gi-awhag usab ang pagpahigayon og mga drills aron dili na makuratan ang mga tawo panahon nga makasinati sila og mga katalagman ug aron makahibalo sila unsay mga pamaagi kon procedures kung dunay mga panghitabo sama sa linog, baha, bagyo ug uban pa.

Nahisgutan sa trainors training nga ang mga pamilya o GKK nga kabus sa material na butang ang kasagaran mas labaw nga maapektuhan panahon sa katalagman tungod sa ilang pagpuyo sa mga lugar nga prone o duol sa mga natural ug man-made disasters sama sa mga GKK nga naa sa coastal areas ug duol sa mga dagkong sapa ug uban pa.

Si Fr. Dublan nag-awhag sa mga delegado nga ipakalat sa uban ang ilang mga natun-an aron mas makahibalo ang mga miyembro sa mga GKK sa mga pagtulon-an nga ilang nahibaw-an mahitungod sa kabuhatan ug disaster-preparedness.

Adunay ikaduhang batch sa maong Trainer’s Training nga himoon karong Mayo 10 sa mao gihapong parokya sa Ascencion.