Kaambitan Sa Mga Santos Ug Si Maria

P: Unsa man ang kahulogan sa “kaambitan sa mga santos”?

T: Kini pulonga nagpunting una sa tanan sa komon nga panag-ambit sa tanang mga sakop sa simbahan diha sa mga balaang butang (Sancta): ang pagtoo, ang mga sakramento, ilabina ang Eyukaristiya, ang mga karisma, ug ang uban pang mga espirituhanong gasa. Ang tinubdan niining kaambitan mao ang gugma nga “dili mamugos sa kaugalingong kagustohan” (1Corinto 13:15) kon dili magdala hinuon sa mga matuohon ngadto sa pag-inambitay sa tanang mga butang nga gihuptan “(Buhat 4:32), bisan gani sa paghatag sa kaugalingong kabtangan alang sa pag-alagad sa labing kabos.

P: Unsa man ang mga laing kahulogan sa “kaambitan sa mga santos”?

T: Nagapunting usab kining pulonga sa kaambitan tali sa mga tawong balaan (Sancti); buot magpasabot, tali niadtong pinaagi sa grasya nahiusa uban sa mga nangamatay ug kang Cristo nga nabanhaw. Pipila niini mga pumapanaw pa sa kalibotan; ang uban nga milabang na niining kinabuhia, gihinloan pa ug natabangan usab sa atong mga pag ampo. Ang uban nakatagamtam na sa himaya sa Dios ug nagapangaliya alang kanato. Hiniusa kining tanan, sila nagalangkob diha ni Cristo sa usa ka banay, ang Simbahan, alang sa pagdayeg ug paghimaya sa Trinidad.

P: Sa una man nga pagsabot ang Balaan nga Birhen Maria Inahan sa Simbahan?

T: Ang Balaan nga Birhen Maria ang Inahan sa Simbahan sa han-ay sa grasya tungod kay mipahimugso siya kang Jesus, ang Anak sa Dios, ang Ulo sa lawas nga mao ang Simbahan. Samtang siya himalatyon diha sa krus gihatag ni Jesus ang iyang inahan ngadto sa iyang tinun-an inubanan sa mga pulong, “Siya ang imong inahan” (Juan 19:27). (Kompendiyo Sa Katesismo Sa Simbahang Katoliko, 194-196