Alay Kapwa 2023 Launching

Ang Alay Kapwa usa ka programa sa CBCP-National Secretariat Social Action, diin gibuhatan kini og konkretong aksyon sa Archdiocese of Davao pinaagi sa Archdiocesan Social Action Center (ASAC). Ang tema karong tuiga nagkanayon: “Alang sa Synodal nga Simbahan: Kumonyon, Partisipasyon, Misyon.”

Pinaagi sa Parish Social Action Ministry (PSAM) gilunsad ang Alay Kapwa 2023 sa St. Mary of the Perpetual Rosary Parish sulod sa Santos nga Misa niadtong February 26, 2023 sa alas 3:30 sa hapon diin gipangulohan sa Kura Paroko, Fr. Dionisio C. Tabiliran. Gibendisyonan ni Fr. Diony ang mga galamiton alang sa Alay Kapwa nga gidala sa mga GKK Servant Leaders (GSL).

Pagkahuman sa paglunsad kon Launching sa Alay Kapwa sa Parokya, ang matag Gagmay’ng Kristohanong Katilingban (GKK) sa Parokya pinaagi sa Tigpasayon Pundok Banay (TPB) inubanan sa mga GSL gitahasan na sa pagsugod sa ilang gimbuhaton diha sa pag-ampo sa matag panimalay nga nahisakop sa tagsa-tagsa nila nga GKK.

Diha sa pag-ampo ug sa pagpamalandong naka partisipar sila diha sa panaw sa Simbahang Synodal pinaagi sa buhat sa kalooy kon almsgiving diin sa ilang pagsakripisyo panahon sa kwaresma mamahimo nga ihalad kini sa alay kapwa aron makatabang sa mga nanginahanglan. (Hermie Mapute, Parish SoCCom)