Mga deboto sa Mediatrix nagtigum sa Spirituality Center, Babak

Niadtong Marso 4, Sabado sa alas diyes y medya sa buntag, nagkatigom na usab ang mga deboto sa Our Lady of Mediatrix of All Grace didto sa Holy Family Spirituality Center nga nahimutang sa Purok 6, Brgy. San Agustin, Babak, Island Garden City of Samal. Sa sulod sa walo katuig, nga batasan na sa mga deboto ang pagpahigayon ug misa sa maong dapit matag unang Sabado sa bulan.

Kauban sa mga nitambong ang inahan sa barangay nga si Kapitana Lydia Pacquiao kinsa nahimong inspirasyon sa mga deboto kay taliwala sa iyang daghang buluhaton ug mga responsibilidad , siya nagagahin gayod ug panahon nga mupartisipar sa misa ug sa uban pang mga aktibidad.

Nakighiusa usab sa maong okasyon ang Bise Mayor sa lungsod nga si Vice Mayor Lemuel “ Toto “ Reyes. Siya nagpadayag sa iyang pagsuporta sa mga umaabot pa nga mga proyekto ug aktibidad.

Ang nagulo sa Santos nga Misa nga si Fr. Ricky Penalosa, DCD, kura- paroko sa parokya sa Birhen Dolorosa sa Babak, nag-awhag sa mga parokyano nga mamalandog sa mga mahitabo sa matag kinabuhi bisan pa man sa daghang buluhaton labi na gayod ning panahon sa kwaresma. Siya nidungang nga angay natong susihon ang atong kasing-kasing sa pagdawat sa grasya sa Dios.

Malipayong nagpasalamat si Mrs. Vilma Rivas, Chief Steward sa Missionaries of the Holy Family Spirituality Center, sa tanang mga nitambong sa maong okasyon ug nihangyo sa tanan sa pagtinabangay aron magmalampuson ang mga paningkamot nga matukod sa luna ang rebulto sa patron, Our Lady of Mediatrix of All Grace. Kini usa ka tinguha nga ang mga katawhan dili lamang ang taga Isla Samal nga kanunay makahinumdom sa paggahin ug panahon sa pag-ampo ug pasalamat. (Flor Arellano-Deloria)