Pagpadayag sa Misyon

Ika-2 nga Domingo sa Panahon sa Kwaresma (March 5, 2023)
Gn 12:1-4 / Ps 33:4-5, 18-19, 20, 22 / 2 Tm 1:8-10 / Mt 17:1-9

Ang Ebanghelyo sa ikaduhang Dominggo sa kwaresma naghulagway sa pagkausab sa panagway ni Jesus sama sa sidlak sa adlaw ug ang iyang sapot sama kaputi sa kahayag. Kini nahitabo didto sa bukid ug sa atubangan sa pinili nga mga tinun-an. Kini nga paghulagway sa atong Ebanghelyo nagpahinumdom kanato sa nahitabo kang Moises sa dihang siya mitungas sa bukid ug nakig-istorya sa Dios. Kita gipahinumdoman nga ang Ginoong Jesus mao ang bag-ong Moises nga magluwas sa katawhan gikan sa kaulipnan sa sala. Si Jesus, ang panagway sa dili makita nga Dios, naghatag kanato sa timaan nga ang atong kinabuhi dili lamang dinhi kutob, matun-as ug mahanaw, apan kita mabanhaw ug makig-uban sa Dios. Ang panan-awon nga nasaksihan sa mga tinun-an usa ka pagtilaw kon unsa ang mahitabo inig abot sa hustong higayon.

Ang pagkausab sa panagway ni Jesus usa ka panghitabo sa pag-ampo. Sa pag-ampo ni Jesus siya misulod sa pagkahiusa sa Dios, Iyang gitugyan ang iyang tawhanon nga kabubot-on ngadto sa Amahan. Sa ingon, ang kahayag nagpuno Kaniya ug nagpadayag sa kamatuoran sa kinatibuk-an niyang pagkasiya. Si Jesus mao ang Dios, ang kahayag gikan sa kahayag.

Ang labing importante nga punto mao nga: Ang pag-usab sa iyang panagway, usa ka pagpaabot sa pagkabanhaw, ug kini naghulagway og kamatayon. Si Jesus ug ang mga tinun-an nanganaog sa maong bukid aron sa pagtuman sa iyang misyon didto sa krus. Kini nga paghatag sa kaugalingon, usa ka makaluwas nga gugma sa Dios. Ang Dios wala magsapayan sa paghatag sa iyang Anak nganhi kanato. Bisan sa kapait nga giantos ni Jesus, Siya nagmadaugon sa pagluwas sa atong mga kaugalingon; batok sa sala ug kamatayon. Ang tawo nga gihimo sa Dios sa ikaunom nga adlaw – nagmasupilon ug adunay kamatayon, apan ang bag-ong tawo nga mao si Jesus naghatag sa kaluwasan ug kinabuhi.

Karon ang hagit kanato nga mga disipulo ni Jesus andam ba kita sa pagsaksi sa atong pagtoo sa atong Ginoo? Dili lang ba kita kutob sa maong bukid sa kahimayaan ug sama kang Pedro moingon, “maayo gayod nga ania kita dinhi.” Ang atong kahimayaan nagsukad diha sa pagsakripisyo ug paghatag sa atong tibuok kinabuhi diha sa atong Ginoo. Ug pinaagi nianang maong pagsakripisyo kita makaingon nga ang atong kahimayaan anaa sa Dios nga mao ang atong kahayag ug kaluwasan. Ug ang atong Amahan nga atoa sa langit moangkon kanato nga mag-ingon “Mao kini ang pinalangga kong mga anak.” (Bro. Soren Abellanosa)