Higugmaa ang imong kaaway

Ika-7 nga Domingo sa Ordinaryong Panahon (February 19, 2023)
Lv. 19:1-2, 17-18 / Ps. 103:1-2. 3-4. 8. 10.12-13 / 1 Cor. 3:16-23 / Mt. 5:38-48

Apan karon sultihan ko kamo: higugmaa ang inyong mga kaaway ug pag-ampo kamo alang sa mga tawo nga nagpasipala kaninyo.” Mateo 5:38-48

Matag usa kanato pamilyar o nakadungog na niini nga ebanghelyo, ug sa atong pagbansay lisod kini buhaton labi na ang paghigugma sa atong mga kaaway ug pagbuhat og maayo, dugang pa ang pagpasaylo kanila. Ang sugo diha sa paghigugma nagsukad pa sa kinaraan nga panahon, apan sa ebanghelyo kini nadungog sa mga disipulo ni Jesus nga makasinati sa pagpanglutos. Maong kini usab ang hagit kanatong tanan sa paghigugma ug sa pagpasaylo sa atong kaaway. Tuod lisud kini buhaton sa uban, ilabi na sa tawhanon nga panglantaw, apan mahinungdanon kini sa espiritohanong panglantaw.

Busa duna ako’y tulo (3) ka punto sa pamalandong sa atong mga pagbasa karon, Una: mao nga ang pagpasaylo maoy atong kusog. Mao kini ang punto sa atong unang pagbasa karon, pananglit nga makaatubang kita sa atong kaaway. Atobanga siya uban ang malumong kasing-kasing. Ayaw tugoti nga ang imong kasuko maoy motigbabaw. Realidad kini nga dili nato mabuhat sa uban, labi na kung dako gayud ang atong kalagot kanila. Busa ang hagit mao ang pagpasaylo kanila, aron kita mulambo sa atong kinabuhi.

Ika-duha: ang pagpasaylo mao atong kalingkawasan. Ang sala sa tawo dili unta magpabilin sa atong huna-huna, apan ato kining ipagawas aron kita makalingkawas. Usahay sa atong kinabuhi, kanunay natong gina balik-balik ang atong kasakit kaniadto. Nga daw nahikot na kita sa atong kalagot, imbis nga kita ang naay kontrol sa atong kalagot. Maong dako kaayong hagit kanatong tanan, nga bisan naglagot nata sa uban, unta mupatigbabaw gihapon ang atong pagkamaloloy-on.

Ika-tulo: ang pagpasaylo grasya sa Dios. Ug mao kini ang punto sa atong ebanghelyo karon, nganong maglisod kita og pagpasaylo sa uban? Tungod kay kini wala nato napuy-an sa atong kinabuhi. Tungod napatigbabaw man gihapon ang atong kasuko og dili nata abri sa pagpasaylo. Busa ang hagit kanato mao ang pagpangayo sa grasya sa atong Ginoo, aron kita makapasaylo sa uban og aron kita usab mamahimong maloloy-on kanila. Pinaagi sa grasya sa Ginoo, kita usab makapasaylo sa uban.

Sa kataposan ang paghigugma sa atong mga kaaway tibuok kinabuhi nga hagit. Magpadayon kita nga pasakitan, dili tahuron og pagluiban. Apan hinumdomi kanunay nga ang imong kaugalingon maoy tinuod nga kaaway sa matag sitwasyon. Gusto ni Jesus nga kita makiggubat sulod sa atong kaugalingon. Ang kataposang butang nga gusto niya nga atong buhaton mao ang pag-ayo, o pagpanalangin ug paghigugma sa atong mga kaaway. (Bro. Ranie Boy Pamplona)