Kanindot Sa Atong Pagtoo

(Excerpt from the Homily of Most Reverend Romulo G. Valles, D.D., on the Feast of the Presentation of the Lord, 12th Parochial Fiesta Celebration of Virgen de los Remedios Parish, February 2, 2023 at Crossing Bayabas Toril, Davao City)

Kada fiesta gyud ang diwa sa atong malipayon nga pagpadayag sa atong pagtoo, maoy mupatigbabaw. Ang pyesta mao ang panahon nga maya kay ta malipayon kita, bisan gong daghan kaytag utang, bisan gong…magkulismaot atong nawng. Tungod sa pagtoo, kuan ta taas noo, kuan kaayo ta, isog kaayo. Dili isog na binagis pero isog, kampante pagayo nga kining mga kangitngit sa kinabuhi, kining mga sulbarunon sa kinabuhi, kaya nako ni tungod ako pinalangga sa Ginoo. In particular uban ni Fr. Dondon, panahon kini sa pagpasalamat nato nga adunay particular nga hagit sa parokya. Kadtong dunay mga particular nga responsibility sa parokya, mga leaders sa parokya, mga pangulo sa mga ministriya sa parokya, labi nang mga leaders sa atong mga GKK.

Sa gasa sa pagtoo in general ug gasa sa hagit ug makanunayong pagpangalagad, kining misaha karon kining pistaha karon mao ang pagsaulog sa pagpasalamat. Malipayong pagpasalamat sa Dios sa anaa kanato nga pagtoo.

Sa atong mga pagbasa karon, labi na sa ebanghelyo, nindot kaayo nga source, tuburan sa malipayong pagpasalamat. Ato pang mahuptan karong adlaw gikan sa ebanghelyo ni San Lukas. Ang saysay ni San Lukas karon gitapo ang duha ka punto ang duha ka kustombre nila ang unang kustombre mao ni: kon ang babaye manganak, mura siyag mahugaw unya paaboton ang kwarenta diyas unya maghimo silag ritwal sa paglimpyo kaniya, mao nang purification of Mary, muadto sa templo, duna kay halad unya himuon ang seremonyas sa paghinlo sa inahan. Ika-duha batasan nila nga ang panganay nga lalake, anang aktoha pod dalhon sa templo ug ihalad ngadto sa Dios, ipresent ngadto sa Dios mao nang presentation of the Lord.

Mangutana kita, unsa may atong makuha karong pistaha, labi na sa nindot nga batasan ayaw gyud na walaa, magdala tag kandila kay karon lagi pista pod sa Candelaria. Una, nindot kaayong pahinumdom, sa dihang mitingog si Simeon, “siya ang kahayag sa katawhan, Maria, Jose kanang batang inyong gidala, siya ang kahayag sa katawhan.” Mao na ang rason nga duna tay kustombre, Candelaria. Kanang kahayag sa kandila, gikan na sa giingon sa ebanghelyo karon, ang batang Jesus mao ang kahayag sa tanang nasod. Mga igsuon pagkanindot sa larawan, kitang tanan diay karon nga nagsimba ning maong fiesta sa atong parokya sama kang Maria, kang Jose nakadungog sila, “kanang bata mao ang kahayag sa kalibotan, kahayag nga magpildi sa kangitngit.”

Kon karon nanimba kita, klareks kaayo ang istorya nga ang atong pagtoo kang Kristo, si Kristo nga anaa kanato, siya ang kahayag. Kon maggunit ta kang Kristo, kahayag ta alang sa uban. Busa ang pangutana, kamusta man ang kahayag, basig “kahayag kuno, dugay nang napawong.” Because of faith ingon ta, “ay labaw pa sa kandila”, kita naggunit sa kandila nga mao si Jesus. Balikon nako ang pangutana, ang hagit, ang reminder, salamat sa Dios kay dunay reminder, “kumusta ang imong kandila, kumusta ang imong paggunit kang Jesus?” Kumusta ang imong paggunit sa kandila nga kung dunay huyop sa temtasyon, kung dunay huyop sa discouragement, kung dunay huyop nga daw madani ka sa imong pagtulon-an, imo bang gigunitan ang kandila?

Ikaduha kung maminaw ta sa gisulti ni Simeon, “ikaw Maria, ikaw Jose, bantayi nang bataa.” Translation, bantayi kung maggunit sa kandila ni Kristo karon. Kung naa si Kristo nimo, ang mga tawo mabisto sa ilang hunahuna, kung naa nimo ang kandila, mahimo kang konsensya alang sa uban. Ingon si Simeon, “Jose, Maria kanang bataa maong kahayag siya pod mupabisto kon unsay naa sa kasingkasing sa tawo.” Mabisto sila sa pagdool kang Hesus kung puti ba o itom ba ang lihok sa ilang kasingkasing. Kanindot unta pod no kung kita dili ta hari-harion nga mangasaba, magwali, hilom lang, very gentle candle pero in many ways atong mga silingan muingon nga, “hala maulaw ta kay naa si mare, buotan raba na uy,” matandog sila.

Hinaot unta dili mangasaba, dili kanang murag hawd ta, but a gentle candle nga unta mu-glow, gentle lang unya ang uban makaingon, “uy tama noh, maayo nga magbinuotan ta.”

Unya ang ika-tulo, karong pistaha, si Kristo nga anak sa Dios, gihalad sa templo, mga igsuon ko dinhi sa parokya nato, ang batang Jesus gigunitan ni Birhen Maria, ilang gihalad sa Dios. Kanindot ba nga matag-karon ug unya kitang tanan sa parokya, conscious ta, kanunay ta magbantay nga diay kanunay ta ihalad ngadto sa Dios. Ma-Dominggo dinhi sa parokya, sa GKK nga pag-ampo, kasaulogan, kada Sunday diay bantayan nato ning elemento sa atong pagtoo, kinabuhi sa pagtoo nga ihalad ta. Humot ba ta o baho, nakaligo ba o wala? Diba kung unsay atong ihalad, kanang nindot diba?

Sa ato pa ang hagit karon nga pyesta, nga kitang tanan, ang usa sa elemento sa kinabuhi sa pagtoo, kanunay tang ihalad, muduol sa Dios. Kon ug galing kulang ta, medyo may pagkahugaw ta, needing purification, paglimpyo, ayawg kabalaka, ayawg kabalaka, dili ni [ang Ginoo] isog nga muingon, “linya mo diha, kanang mga bolingong nawng uli, kanang mga daotag batasan, uli, wa mo’y labot.” Dili angayan kita pero mutabang Siya nga ma angayan ta.