Kahiusahan pinaagi sa Bibliya

Bulan sa Enero gipahigayon ang daghang kalihokan alang sa National Bible Month nga daan nang giproklama pinaagi sa Presidential Proclamation 124 niadtong 2017. Isip mga Kristyanos kita gi-awhag diha sa pagbasa ug pagpakita ug pagtahod niini. Karong tuiga sab gisuportahan kining maong proklamasyon dinhi sa dakbayan sa Dabaw pinaagi sa Resolution nga gisumiti ni Hon. Pilar Braga.

Tungod sa pangulo sa tigom sa mga Kristyanong ministro nga mao ang Davao City Ministers Fellowship nga si Pastor Rueland Badoy, Director sa Archdiocesan Bible Apostolate of Davao (ABAD) nga si Fr. Ritsche Gamaya, nagmalampuson ang mga plano sa pagpatanyag sa pagbasa sa bibliya.

Usa na dinhi ang pipila ka promotions sulod sa mga establisyimento, eskwelahan ug mga media outlets sama sa stasyon sa radyo ug sa mga social media pages. Niadtong Enero 20 giimbitahan sa DXGN 89.9 Spirit FM si Pastor Rueland ug si Mr. Concordio Pondias lay coordinator sa Archdiocesan Bible Apostolate of Davao kauban sila Sis Annie Libres ug Fr. Ritsche alang sa programang Ambit GN.

Adlawng Lunes, Enero 23 hangtod sa 24, gipahigayon usab ang 30 ka oras nga Bible Reading Marathon ug kini gipagasalmutan sa nagkalain-laing mga denominasyong Kristyano didto sa Rizal Park sa dalang San Pedro. Sumala pa ni Pastor Rueland, siya nagmalipayon ug nagmalaomon nga niadtong higayona sa ika-duhang adlaw daghan pang mga katawhan ang maminaw ug muduyog sa maong marathon. Mapasalamaton siya tungod human sa duha ka tuig nga wala mapatuman ang public reading sa bibliya, karong tuiga nahibalik na kini ug tungod rapod sa suporta sa mga kaigsuonan sa gobyerno.

Natapos na ang usa ka bulan nga paghatag ug bili sa importansya sa balaang kasulatan, apan wala magpasabot nga muhunong kita sa pagbasa ug paghimo niini isip atong sumbanan. Sa kanunay kita unta mahimong mga instrumento sa pagpakaylap sa pulong sa atong Dios.