Asin nga Magamping ug Kahayag nga Mulapnag

Ika-5 nga Domingo sa Ordinaryong Panahon (February 5, 2023)
Is 58:7-8 / Ps 112:4-5. 6-7. 8-9 / 1 Cor 21:1-5 / Mt. 5:13-16

Kamo ang asin sa katawhan … kamo ang kahayag sa kalibotan (Mt 5:13-16).

Kinahanglan natong masabtan nga kining mga simbolo dunay kalambigitan diha sa balaod sa mga Hudiyo. Ang asin usa ka butang nga kinahanglan isablig ibabaw sa matag halad nga gidala ngadto sa Dios ingog timaan sa pakigsaad, nga naghatag ug kahayag sa kahulogan niini nga mga larawan. Ug sa laing bahin, ang asin usab usa ka rekado nga mag preserba og mga pagkaon o mag pahatag og lasa sa usa ka pagkaon. Alang sa mga Israelita, ang pag-abot sa Mesiyas gisimbolohan sa kadaogan sa kahayag batok sa pagano nga kangitngit. Ang mga Kristohanon, isip bag-ong Israel, gihatagan ug bulohaton: sila adunay gahom sa pagpangulo, pagbalaan, ug pagpadaghan sa katawhan pinaagi sa ilang pagtuo ug gugma.

Kitang mga binunyagan, mga misyonero nga mga disipulo nga gitawag aron mahimong buhi nga Ebanghelyo sa kalibutan; pinaagi sa pagpuyo sa usa ka balaan nga kinabuhi, kita isabwag sa lain-laing mga palibot ug manalipod sa mga tawo gikan sa pagkadunot, sama sa asin; ug pinaagi sa pagdala sa kahayag ni Kristo pinaagi sa pagsaksi sa tinuod nga gugmang putli, atong madala ang Ebanghelyo ngadto sa kinatumyan sa yuta. Apan kung kitang mga Kristohanon mawad-an sa atong lahi nga lami ug mohunong sa pagdan-ag sa atong kahayag sa kalibutan, kita mahimong dili epektibo. Ang pagsabwag sa kahayag sa tibuok kalibutan usa ka bililhon nga paningkamot. Nindot usab ang pagpreserbar sa hinatag ni Kristo nga kahayag nga atong napanunod.

Ang mga Kristohanon gitawag nga mahimong kahayag, aron mahimong mga tinubdan sa kahayag sa tanan nga naglibot kanila. Usa ka tinubdan sa kahayag nga dili sa iyang kaugalingon nga binuhat kondili gihatag kaniya sa Dios. Isip mga tigdala niini nga sulo, ato kining buhaton. Kon ang usa ka Kristohanon magpalong niining kalayo, siya usa ka Kristohanon sa ngalan lamang, dili sa buhat, ug ang iyang kinabuhi walay kahulogan. Ang gasa ni Kristo sa kinabuhing dayon walay makatupong og usa sa labing dakong kalipay sa pagka-Kristohanon mao ang pagsulti sa uban bahin sa maong gasa. (Bro. Angelo Espinas)