Pro-Life Month Gipangandaman

Ang Pastoral Agency sa Family Life Apostolate duyog sa Archdiocesan Social Communications Committee nagkunbuya alang sa pagpangandam sa PRO-LIFE MONTH karong bulan sa Pebrero. Duyog sa mga directors nga sila Fr. Ritsche Gamaya ug Fr. Orlando Angelia ang duha ka ahensya nagtigum niadtong 14 sa Enero adlawng Sabado.

Dakong sangon ang pagpakaylap sa kabug-aton sa bili sa kinabuhi sulod sa pamilya busa ang duha ka ahensya naningkamot nga kini matagaan sa pagtagad. Ang mga plano dili lamang alang sa usa ka adlaw nga selebrasyon apan alang sa usa ka bulan nga pagpahinumdom sa mga Katoliko nga angay tagaag bili ang gasa sa kinabuhi.

Ang maong selebrasyon ipalansad sa unang Dominggo sa Pebrero ug kini pormal nga pagaabrihan sa matag parokya. Apil sa mga kalihokan ang paghalad sa Santos nga Rosaryo pahinungod sa Gasa sa Kinabuhi nga pagatawgon ug “Rosary for Life.” Duna sab mga programa sa radio nga maghisgot sa kabililhon sa gasa sa kinabuhi pinaagi sa Kahayag sa Pamilya nga madungog matag Dominggo sa alas sais hangtod sa alas syete sa gabii. Pipila sa mga hilisgutanan ang mga mosunod: Gasa sa Kinabuhi, Pagkapiniyalan, Pagamuma sa Kinaiyahan, Natural Family Planning, Teenage Pregnancies ug Suicidal Tendencies.

Ang pinakaulahing hilisgutan batok sa mga kaso sa pagpakamatay ilabi na sa mga batan-on tawag gayod sa panahon. Dili kini bag-o kanato ug nahibalo kita nga kinahanglan ang paghisgot niini nga kahimtang. Dugang pa sa mga kalihokan ang pagbendita sa mga lubnganan sa wala matawo kon Blessing of the Tomb of the Unborn, pagampo ug pagbendita sa mga buntis ug mga pamilya. Kini pagahimuon sa matag parokya. Gilaoman usab ang dakong family day nga ipahigayon sa kinaulahiang Dominggo sa Pebrero.

Ang maong mga lakang dili gayod magmalampuson ug wala ang mga magtotoo nga musuporta niini. Atangi ang mga kalihokan nga giandam sa duha ka mga ahensya duyog sa mga parokya sa Arkidayosis sa Dabaw.