Sinulog Dance Sa OMPH

Ang piyesta sa Sto. Niño o ang batang Hesus, ginasaulog matag ikatulo nga Dominggo sa Enero. Ato syang gipasidunggan sama sa atong mga anak isip mga gasa ug instrumento sa Dios sa kaluwasan alang sa katawhan. Si Sr. Santo Niño atung gitagaan ug pag-ila sa altar para sa abunda nga panalangin sa pamilya ug pagpanalipod sa kabataan.

Nagpahigayon ang Our Mother of Perpetual Help (OMPH) Davao sa tinuig nga selebrasyon sa PISTA NI SR. STO. NIÑO gikan sa alas 6 sa buntag hangtod sa alas 6 sa gabie nga Misa niadtong Enero 15, 2023 sa ika-duhang Dominggo sa ordinaryong panahon.

Ang Redemptorist Youth Movement (RYM) naghatag ug pasundayag pinaagi sa paghalad ug Sinulog Dance ngadto sa batang Hesus paghuman sa kada misa. Gidayeg ang maong pasundayag ug daghang mga tawo ang nakasaksi sa kaanindot ug kahulogan sa maong sayaw.

Sa laing bahin, atol sa misa, nanumpa sa atubangan sa altar ang mga bag-ong opisyal sa Parish Pastoral Council (PPC) nga gipangulohan sa Presidente ug mga miyembro niini. Human sa selebrasyon, nagkatapok-tapok ang mga bag-ong opisyal kauban sa mga parish workers alang sa dugang pagpahibalo sa mga umaabot nga GKK Plans didto sa OMPH Gym. (Mary Grace Gonzales | OMPH SoCCom)