Mainyo unta ang Kalinaw

Ika-4 nga Domingo sa Ordinaryong Panahon (January 29, 2023)
Zep 2:3, 3:12-13 / Ps 146:6-7, 8-9, 9-10 / 1 Cor 1:26-31 / Mt 5:1-12

Sa matag higayon nga magsaulog ang Obispo og Misa, inig kahuman niya sa pagpanguros, siya motimbaya sa pag-ingon “ang kalinaw maanaa kaninyo.” Kini nga pagtimbaya nagsukad gayod diha sa balaang kasulatan nga diin naghulagway sa lawom ug makahuloganon nga pulong. Ang pulong nga nakagamot gayod sa Diosnong kinaiya ug dili matukib kon gamiton sa pagsabot ang tawhanong kahibalo lamang. Diha sa atong ebanghelyo si San Mateo naghisgot nga si kinsa kadtong tigpatunhay sa kalinaw pagatawgon nga bulahan ug ilhon nga mga anak sa Dios. Karon aduna na kitay ideya kon si kinsa ang mga anak sa Dios, kadto lamang mahigugmaon sa kalinaw. Kon atong lantawon pag-ayo, kon adunay panaghiusa, aduna sa’y kalinaw. Ang balaang kasulatan nagngalan sa demonyo nga “diabolos” nga nagpasabot “to cast apart”, “to scatter”, ang lihok sa demonyo mao sa tigpasalaag sa katawhan. Atong hinumdoman kanunay nga mahibaloan nato nga atong gihimo iya sa Dios kon kini nagpahiusa ug adunay kalinaw sa tanan, apan kon ang atong gihimo nagpatibulaag sa uban, atong susihon kon kini iya ba sa Dios o sa demonyo.

Ang gipadayag ni Hesus kabahin sa tigpatunhay sa kalinaw ug tawgon nga mga anak sa Dios. Ang kalibutan nagtanyag kanato kon unsa ang kalinaw. Ang kalinaw nga wala ang presensya sa kagubot, ang kalinaw nga wala ang gyera, ang kalinaw nga wala ang panagbingkil. Sa laing bahin, ang gitanyag nga kalinaw ni Hesus mao ang panagtagbo tali kanato ug sa Dios. Kalinaw nga langitnon sa dihang atong mahimamat ang Dios sa atong kinabuhi. Kini ang mas lawom nga pag-ila sa kalinaw nga diin ang Dios maoy maghari sa atong kinabuhi. Si Hesus ang larawan sa dili makita nga Dios, maoy maghatag kanato sa matuod nga kalinaw.

Ang kalinaw nga nagasukad sa atong pagkasuod sa Dios, sa atong isigkaingon ug sa tanang kabuhatan. Si kanhing Santo Papa Benedicto XVI nag-ingon “Ang tawo gibuhat alang sa kalinaw nga usa ka Diosnong gasa.” Kini nga kamatuoran usa ka pagpadayag nga kita gibuhat alang sa kalinaw, apan tungod sa sala kita nahimong dili malinawon ug adunay panagbingkilay sa isigka-ingon ug sa kabuhatan ug labaw sa tanan sa Dios nga nagbuhat kanato alang sa kalinaw. Atong pangayuon sa Dios ug paningkamutan sa kanunay nga mahibalik kita sa Dios nga maoy tinubdan sa tanang kalinaw. Sa katapusan, sa matag-apil nato sa Santos nga Misa uban ang atong Obispo, sa matag ingon niya nga ang kalinaw maana kaninyo atong mahinumdoman nga ang Dios naghimo kanato alang sa kalinaw, ug atong paharion kining kalinaw diha sa atong kinabuhi. (Bro. Soren Abellanosa)