Kamusta Ang Lakang Sa Pagkapiniyalan?

Mahinumdoman nga niadtong miaging tuig, bulan sa Abril nagpagawas og sulat ang atong arsobispo sa arkidayosis sa Dabaw, Most Rev. Romulo G. Valles, D.D. mahitungod sa pagwagtang sa arancel alang sa mga funeral services. Kini usa lamang ka lakang sa gipahigayon ug gisugdan nang systema nga gitawag ug STEWARDSHIP PROGRAM.

Isip mga tinugyanan ug piniyalan sa katilingban, ang atong tumong niining nagprograma mao ang paghatag kanato sa kagawasan kauban sa ensaktong pagkaamgo nga kita dunay responsibilidad sa matag usa, ug sa simbahan. Tuod man giwala ang fixed amount o fee sa mga serbisyo sa patay apan kita, tungod sa atong pagkatinugyanan makaamgo diha sa kamutuoran nga dunay panginahanglan ang simbahan.

Niadtong Enero 9, sa pinakaunang pulong sa mga kaparian sulod sa atong Arkidayosis nahisgutan ang mga lakang sa pagpasabot ug pormasyon niining programa sa pagkapiniyalan. Pipila sa mga parokya sama sa Ascension of the Lord, St. Joseph the Worker ug St. Francis of Assisi sa Maa ang nagpadayag sa ilang mga programa ug pormasyon sa parokya ug mga GKK. Kini nga mga pagpadayag alang sa kahibalo sa sa tanan nga wala pa kaayo makasabot kung unsaon pagdagan ang programa.

Ang matag bikaryato nagpadayag usab sa ilang mga panginahanglan ug nagsubli sa ilang mga kalisod. Ang mga kaparian sulod sa bikaryato sa San Pablo mipadayag nga nindot kini nga mga lakang apan unta una kita muambak sa mga musunod, kinahanglan gayod ang hingpit nga pagtasal o assessment sa mga kasamtangang programa. Tungod daan nang gisaysay ang mga plano sa pagwagtang usab sa mga fixed fees alang sa bunyag ug kasal, gihangyo sa mga kaparian ang paghatag usa ug klarong sistema.

Sa pagpadayag usab ni Archbishop Valles, mamahimo tingaling tawgon ang mga offering ug “halad pasalamat” kini hulip sa gituohang bayad sa mga serbisyo sa simbahan ug halad pahinungod sa mga pag-ampo nga ilang ipahalad. Tuod man ubay-ubay ug taas pa ang labangunon apan kini matawag ta ug usa ka produkto sa atong pagpaminaway niadtong mga synodal consultations.