Artista Nahimong Santo

Lolek  ang tawag kaniya sa iyang mga suod nga higala sa batan-on pa siya. Sa nag edad siya og nuebe namatay sa sakit ang iyang pinanggang inahan.

Isip kamanghuran sa tulo ka magsuon, mitubo siya uban sa suporta sa relihiyoso niyang amahan. Katimbang niya ang iyang mahal nga magulang.

Sa iyang pagtungha sa Unibersidad sa Jagiellonia sa Krakow, Poland, iyang namatikdan ang hilig niya sa pag-arte. Siya  miapil sa gitawag og “Studio 38”, grupo sa mga batan-ong artista kinsa nagamugna og mga palabas ug drama sa ilang lugar. Isip artista, mahilig usab siyang mosulat og mga tula ug balak nga dunay lalom nga kahulugan.

Human sa akademikong tuig 1938-1939, siya midala sa papel nga Sagittarius sa dula nga The Moonlight Cavalier. Apan bisan pa sa iyang kasikat, iyang nabati ang tawag sa Dios kaniya. Siya mitubag sa tawag sa pagkapari. Matud pa niya, “kalipay nako ang pag-alagad sa katawhan sa Dios diha sa pagsaulog sa Misa matag adlaw.”

Wala lamang siya nagpabiling yano nga pari kondili nahimo siyang Obispo, Kardinal ug naabot niya ang pagka-impluwensiyadong lider sa tibuok kalibutan pinaagi sa iyang pagkahimong Santo Papa sa tuig 1978 hangtod 2005. Siya ang usa sa mga bag-ong santo sa Simbahang Katoliko, si San Juan Pablo II.

Daghang kabatan-onan natandog sa iyang ehemplo. Ikaduha siya sa pinaakataas nga nag-alagad isip Santo Papa. Mikabat sa 483 ang iyang gideklara ug gihimong santo.

San Juan Pablo II ig-ampo mo kami!