Mga Gasang Gipaambit

Niadtong ika-27 sa Desyembre 2022, gisaulog sa Sr. San Roque Parish Malabog ang National Youth Day, Kabahin niini mao ang pagpahigayon og Gift Giving ug Parlor Games sa GKK San Jose Beto nga nahimutang sa Sitio Beto, Brgy. Malabog, Paquibato District, Davao City.

Uban sa matinahurong kura paroko nga si Rev. Father Arnold Balaquinto, namaklay ang mga parokyano sayo sa kabuntagon padulong sa GKK San Jose Beto. Dili tiaw ang pagpadulong didto sa nahisgotang katilingban tungod sa gilay-on niini. Usa hangtod duha ka oras ang baklayon diin adunay sapa nga labangon. Grabe ka lapok ug ka dangog sa dalan niadtong higayona busa dili gayod malikayan nga adunay “ma-slide”, apan wala kini panombalinga sa mga parokyano tungod kay ang dakong tumong nila mao man ang pagpaambit sa ilang gugma ug nga mamahimong gasa ngadto sa mga katawhan sa nahisgotang katilingban.

Human sa pagpahulay, gisugdan dayon ang Santos nga Misa nga gidumala ni Father Arnold.

Diha sa homiliya iyang gipaabot nga ang diwa sa pasko dili lamang mahitungod sa mga regalo nga atong madawat o atong ihatag sa atong isig ka ingon apan ang tumong ug tiunay nga diwa sa kapaskohan mao ang atong lig-on nga pagtoo ug dakong GUGMA nga atong ikapaambit ngadto sa uban.

Pagkahuman sa Santos nga Misa, gisunod na ang pagpahigayon og Parlor Games ug Gift Giving sa mga katawhan diin gipangulohan kini ni Jozeil Crodua, Parish Coordinator sa Pangulo Sa Batan-on kon PSB. Puno sa kalipay ug kasadya ang mga katawhan sa GKK San Jose Beto tungod sa mga gipang-andam nga mga parlor games ngadto kanila, makita usab sa ilang mga nawong ang dakong kalipay tungod sa ilang nadawat nga mga regalo gikan sa parokya sa San Roque Malabog.

Puno sa kalipay nga nagpasalamat si Loreto Isdang ang Pangulo Sa Katilingban sa maong kapilya ngadto kang kang Rev. Father Arnold Balaquinto sa ilang nadawat nga mga regalo ug mapasalamaton usab siya sa mga parokyano nga mipaambit og dakong gugma ngadto kanila.

Atong hinumdoman sa kanunay nga ang mga materyal nga butang nga atong ipanghatag o atong madawat sa matag okasyon kini makahatag og kalipay apan sa hamubong higayon lamang ug kini mawagtang ra usab. Apan kung ang atong dakong gugma atong ika-paambit ngadto sa matag-usa kini makahatag gayud og tiunay nga kalipay, nga diin ang atong kalipay nga matagamtaman walay sama, nga kita usab mamahimong gasa ngadto sa uban.

Sa kanunay, Dalaygon ang Dios!

(Noralyn Largo & Jomar Saguban, Soccom-Zone 6)