“GKK and Parish Day & Christmas Party 2022”

December 30, 2022 – Gisaulog sa tibuok Simbahan ang Solemne nga kapistahan sa Sagrada Pamilya ni Jesus, Maria ug Jose.

Sa samang higayon, gisaulog usab ang GKK and Parish Day ug Christmas Party 2022 sa Parokya sa Sr. San Roque Malabog nga nakahatag og dakong kalipay ug kasadya sa mga parokyano uban sa tema: Family: Seedbed of Vocations.

Niadtong adlawa, una ang paglingaw-lingaw gisugdan ang selebrasyon pinaagi sa Santos nga Misa nga gipangulohan sa kura paroko nga si Rev. Father Arnold Balaquinto.

Diha sa iyang homiliya, siya naghisgot mahitungod sa mga kaakuhan sa pamilya sa Dios o sa katawhan sa Dios nga kita isip usa ka pamilya kinahanglan anaa ang pagpangga, pagtahod, pagpinasayloay ug labaw sa tanan anaa ang atong dakong gugma nga atong ika-paambit ngadto sa uban tungod kay kini nga mga hiyas makahatag og dakong kalipay ug kalinaw diha sa atong pagpuyo o sa atong tagsa-tagsa ka pamilya.

Human sa Santos nga Misa gisugdan na dayon ang usa sa mga aktibidad niadtong adlawa mao ang pagpahigayon og Mr. & Ms. Parish Day 2022 nga gisalmutan sa mga nagkalain-laing sona, nga diin ang nahimong Mr. Parish Day 2022 mao si Sir Gregorio Basilan nga gikan sa sona 10 ug si Ma’am Imelda Hugo ang nahimong Ms. Parish Day 2022 nga gikan sa sona 6.

Nagpahigayon usab og presentasyon ang ang mga Seminarista alang sa mga katawhan diin ilang gipakita ang ilang kinabuhi didto sa sulod sa seminaryo og diha sa ilang pagpasundayag gipakita nila ang ilang taga-tagsa ka mga talento pinaagi sa drama, pagtula, pagkanta ug pagsayaw.

Niadtong taknaa, nanghatag usab ang kura paroko sa nahisgotang parokya og pinaskohan sama sa kalendaryo ug Liturhiya ngadto sa matag GKK, dayon gisunod na ang pagbinayloay og mga regalo.

Mapasalamaton pag-ayo si Rev. Father Arnold Balaquinto sa presenya nga gigahin alang sa nga parokyano ug sa pagsalmot niini sa maong aktibidad. Dako usab ang iyang pasalamat ilabi na sa mga LCM nga maoy nangulo sa programa sa maong aktibidad, sa mga GKK Servant Leaders ug sa mga katawhan nga gikan sa nagkalain-laing sona o lugar aron lamang sa pagpakigduyog sa maong aktibidad ug labaw sa tanan mao ang atong Ginoo nga mao ang tinubdan sa tanan.

Sa kanunay, Dalaygon ang Dios!

(Noralyn Largo & Jomar Saguban, Soccom-Zone 6)