Relasyon sa Pamilya, Lig-ona!

Niadtong Disyembre 30, 2022, malipayong nagsaulog sa kapistahan ang mga parokyano sa Sagrada Pamilya nga nahimutang sa Brgy. Dumoy ug Baliok sa Lungsod sa Dabaw. Kini ang ika-18 ka tuig nga kapistahan human nga natukod ang parokya niadtong 2004. Nagmaya ang mga katawhan tungod sa subling pagpahigayon ug misa ug uban pang mga aktibidad human sa hugot nga pagpatuman sa health protocols tungod sa Covid 19.

Si Arsobispo Romulo G. Valles, DD ang nangulo sa Pontifical Mass sa alas 8 ang takna sa buntag. Sa iyang homiliya, iyang gihatagan ug gibug-aton ang panag-uban sa pamilya ni Hesus, Maria ug Jose taliwala sa dakong hagit nga ilang nasinati. Siya usab nagpahimangno sa mga parokyano nga himuong lig-on ang relasyon sa matag pamilya nga maoy pundasyon sa matag parokya. Siya nanghinaot nga himuong sumbanan sa mga parokyano ang ilang patron, ang Sagrada Pamilya.

Paghuman sa misa, adunay pag-apod-apod ug food packs sa mga parokyano ug gisunod gilayon ang simpleng programa kung diin nagtapok sa pavilion ang mga GSLs kauban ang ilahang mga miyembro. Adunay pagpasundayag sa mga nagkalain-laing talento sa matag-sona. Nisamot ug ka aktibo ug kabibo ang mga nitambong tungod sa gipanghimong parlor games kung diin naghulagway sa pagnaghiusa ug pagtinabangay sa matag grupo.

Sa bisperas sa kapistahan sa Sagrada Pamilya, adunay gipahigayong motorcade sa mga patron sa matag GKK. Kini nakapaikag sa mga katawhan sa paghandom sa kapistahan sa parokya. Sa wala pa nagsugod ang parada, gibindesyunan ni Fr. Roger D. Duhaylungsod, kura-paroko ang mga imahen/ santos sa matag GKK inubanan sa mga miyembro lakip usab ang mga sakyanang gigamit sa parada. Iyang gipangamuyo nga ang tanan giyahan sa mga patron aron kanunay nga madasigon sa pagtuman sa mga bulohaton sa matag katilingban.

Dako usab ang pasalamat ni Emily Dela Torre, ang Parish GKK Coordinator sa tanang suporta sa matag GKK nga makapahimong malampuson sa pagpahigayon sa ika-18 nga Kapistahan sa Sagrada Pamilya. Siya nanghinaot nga ang mga parokyano magpadayon sa pagtinabangay aron nga mulambo ug mulig-on pa gayod ang parokya ug ang matag katilingban. (Flor Arellano-Deloria | SoCCom, Holy Family Parish)