Kinsa Ang Labing Dako?

Pyesta sa Batang Hesus (January 15, 2023)
Is 9:1-6 / Ps 97:1. 2-3. 3-4. 5-6 / Eph 1:3-6. 15-18 / Mat 18:1-5.10

Kon tubagon ni nato nga pangutana, dali natong ilista ang kalamposan, dungog, grado, ug mga kabtangan maoy mahimong sukdanan kung kinsa ang labing dako. Ug kini ang gipangandoy sa daghang mga tawo nga maangkon. Sama sa mga disipulo, gusto sa mga tawo nga mahimong numero uno sa ilang gipili nga karera. Apan, kining mga tawhanong sukdanan dili importante kang Hesus.

Sa pagtubag ani nga pangutana, si Hesus mitawag ug usa ka bata ug naghisgot sa iyang pagkamapaubsanon; mao kini ang unang sukdanan sa pagkadako sa Gingharian sa Diyos. Aron mahimong mapaubsanon sama sa usa ka bata, kita kinahanglan nga makabig aron kita adunay bag-ong panghuna-huna. Kinahanglan natong talikdan ang atong kinaiya nga makigkompetensya sa usag-usa ug magtutok sa pagpauswag sa atong kaugalingon aron kita mausab gikan sa atong daotang mga paagi ug mausab ngadto sa pagkasama sa Amahan nga mao ang atong orihinal nga kinaiya.

Aron mahimong mapaubsanon sama sa usa ka bata, kinahanglan nga mabalik ang atong pagsalig sa Balaan nga Probisyon ug Balaan nga Proteksyon. Ang tawo misulay ug kanunay naningkamot nga mahimong gawasnon ug igo-igo sa kaugalingon. Bisan pa niana, si Hesus nagtudlo kanato nga mahimong sama sa usa ka bata, nga nahibalo sa atong pagkawalay gahom ug atong pagkahuyang. Sama sa usa ka bata nga mapakisayron, si Hesus nagsulti kanato nga magbaton ug kaikag sa pagkat-on gikan sa atong Amahan sa langit. “Sunda Ninyo Ako kay malumo Ako ug mapaubsanon”, nagsulti si Hesus (Mateo 11:29).

Busa kinahanglang makat-on kita kang Hesus nga ang pagpaubos maoy labing dako sa Iyang gingharian. Busa gikinahanglan nga atong wagtangon sa atong kaugalingon ang atong tinguha nga mahimong numero uno. Sa kataposan, kadtong nagpataas sa ilang kaugalingon ipaubos, ug kadtong nagpaubos sa ilang kaugalingon ipataas (Mateo 23:12). (Bro. Ignatius Gonzales, CFA)