Kasalan Sa OLMMP

Nov. 26, 2022 – Doble ang selebrasyon niining adlawa kay gawas sa pagsaulog sa bisperas sa kapistahan sa Our Lady of Miraculous Medal Parish, gipahigayon usab ang ika-8 nga KASALAN SA PAROKYA diin dunay 18 ka paresan ang misalmot ug malampuson silang nagbinayloay sa ilang panaad o vows isip magtiayon nga gi- officiate ni Rev. Fr. Jess Samaniego, ang kura paroko.

Matud pa sa usa ka magtiayon nga adunay duha ka anak ug pito ka tuig nang nag-ipon, dako kaayo ilang pasalamat sa maong programa tungod sa katapusan nahugpong na ang ilang kaminyoon diha sa Sakramento sa Matrimonya.

Kabahin sa maong kalihukan ang Family Life Apostolate (FLA) ug mga Pangulo sa Kristohanong Banay (PSKB) nga maoy nagpaluyo sa tanang panginahanglanon sa kasal sama sa Pre-Cana seminar, interview ug dekorasyon sa simbahan.

Kini luyo sa panghinaot nga molungtad sa kahangturan ang panaghigugmaay ug mahimo kining ehemplo sa uban ilabi na sa mga kabatan-onan ang kasagrado sa sakramento sa kasal diha sa pagtukod ug pamilya nga adunay basbas sa katilingban ug sa atong Labaw’ng Makagagahom. (Marilou A. Luzon, OLMMP-SocCom)