Ika-40 Nga Kapistahan: Katilingbang Nakig-Uban sa Inahang Simbahan

“Katilingban nga mapaubsanong nakig-uban sa panaw sa Inahang Simbahan.” Mao kini ang kinauyukan sa pagsaulog sa GKK Birhen Medalla Milagrosa, Buhangin nga nahisakop sa Parokya sa St. Mary of the Perpetual Rosary sa ilang ika-40 nga Kapistahan kaniadtong Nobyembre 27, 2022.

Ang sugilanon sa Birhen Medalla Milagrosa nahitabo usab sa usa ka panahon sulod sa pandemya ug kalisod sa nasud France. Dinhi gihatag sa Mahal nga Birhen ang milagrosang medalyon pinaagi kang Santa Catherine Labouré tuig 1830. Nag-antos ang Katawhan ug ang simbahan tungod sa French Revolution.

Sa ika-18 saHulyo nagpakita ang Mahal nga Inahan kang Sr. Catherine nga usa ka batan-ong novice kauban sa mga kongregasyon sa Daughters of Charity sa Paris. Dinhi milingkod ang Mahal nga Birhen sa lingkuranan sa direktor sa katilingban ug sa miluhod si Sr. Catherine pagkakita niya niini. Nasundan kini kaniadtong Nov. 27, diin hingpit nang gitunol ni Birhen Maria sa kumbento sa Paris’ Rue du Bac inubanan sa mensahe sa iyang walay puas nga pag-amuma ang usa ka sakramental diin siya mismo ang mihimo sa disenyo niini.

“Have a medal struck upon this model,” ingon sa Bulahang Birhen . “Those who wear it will receive great graces, especially if they wear it around the neck. Those who repeat this prayer with devotion will be, in a special manner, under the protection of the Mother of God. Graces will be abundantly bestowed upon those who have confidence.”

Ang atubangan sa medalya nagpakita kang Maria sa iyang pamilyar nga Imahe isip Imaculada Conception. Siya mibarog sa globo isip Inahan ug Rayna sa tanang katawhan. Adunay mga sinag sa adlaw nga nagadagayday sa iyang mga kamot. Miingon siya kang Santa Catherine “These rays symbolize the graces I shed upon those who ask for them.” Adunay mga Bulahang bato usab sa iyang mga tudlo nga anaa sa mga sinag. Kini nagrepresenta sa kahayag ug grasya nga nakalimtan ug wala napangayo sa tawo. Sa oval nga nagpalibot sa Birheng Maria anaa ang mga pulong nga “O Mary, conceived without sin, pray for us who have recoursed to thee.”

Aron makahuluganon ug mabungahon ang kasaulogan sa kapistahan sa Mahal na Birhen Medalla Milagrosa, nagpahigayon ang katilingban og nobena pahinungod sa Mahal nga Inahan ug aduna usab gihimo nga pagprusisyon sa adlaw sa Bisperas kaniadtong Nobyembre 26, 2022 tuyok sa katilingban ug dayon misunod ang Ika-9 nga adlaw sa pagnobena.

Si Rev. Fr. Romeo “Romy” Coronel, OSA maoy nangulo sa pagsaulog sa Santos nga Misa sa Kapistahan. Matod pa ni Fr. Romy nga ang Medalla Milagrosa dili lamang kay esab-ong sa liog kundi kinahanglan ang hugot nga pag-ampo ug pagsalig para adunay milagro nga mahitabo.

Adunay pag-inambitay sa mga gasa pagkahuman sa Santos nga Misa ug mapasalamaton ug malipayon ang mga GKK Servant Leaders tungod nagmalampuson ang tibuok kasaulogan sa Kapistahan.

Viva Birhen Medalla Milagrosa!

(Allyza Hope Tabigue, GKK SoCCom)