PPC Members and GSL’s Formation sa San Roque Parish-Malabog

Niadtong Nobyembre 27, 2022, atol sa pagsaulog sa unang Dominggo sa Adbyento, human sa Santos nga Misa, adunay gipahigayon nga panagtapok sa mga GSL’s og PPC members sa Parokya ni San Roque sa Malabog. Tumong sa maong aktibidad mao ang pagpahinumdom og pagpasabot sa mga parokyano kabahin sa tinuond nga mensahe nga gipadayag niining panahon sa Adbyento nga mao ang pagpangandam sa pagbalik sa Ginoo.

Ang mga pormasyon gidumala mismo ni Father Arnold Balaquinto, kura paroko. Matud pa niya, “Without the presence of Christ, there is no such thing as Christmas.” Ang esensiya sa Adlaw sa Pasko mao si Kristo, kinsa atong Manunubos nga tuburan sa paglaom, kalinaw, kalipay og gugma.

Sa susamang higayon, gitapos usab ang tulo ka adlaw nga seminar sa 24 ka mga bag-ong PSP og 15 ka PSL nga gituboy sa ilang tagsa-tagsa ka mga GKK og kini sila gitakna nga ipadala karong umaabot nga unang bulan sa bag-ong tuig.

Gipaila-ila usab sa atubangan sa mga pangulo ang bag-ong midawat sa katungdanan isip PSK sa ilang tagsa-tagsa ka mga GKK. Kini mao sila Bro. Julito Crodua, Sto. Rosaryo-Balinsuag, kanhing PSA og Sis Leah Bernardino. Kini nagpasabot lamang nga isip mga alagad sa Ginoo, gikinahanglan nga ablihan ang mga kasing-kasing sa mga maayong kausaban nga mamahimong mahitabo. Sanglit transisyonal man gayud ang pagpanglagad.

Nahuman ang maong adlaw nga puno sa pagtulon-an, uban sa panghinaot nga kini nga mga kaalam mapalapnag usab ngadto sa uban. Wala man ni usa kanato nga angayan, apan tungod sa Gugma sa Dios, kita mamahimo nga maangayan. Sa atong pagpaabot sa Adlaw sa Pasko, atong hinumdoman ang kabililhon sa kanunay nga pagpaningkamot sa paghimo sa mga butang nga makapahimuot sa Dios.

Sa kanunay, Dalaygon ang Dios. (Jozeil Comapas Crodua)