Mangadto Kita sa Balay sa Ginoo

Ang salmo responsoryo atol sa ika-13 nga kapistahan sa Our Lady of the Miraculous Medal sa parokya sa Indangan haom gayod sa pagpakita sa kalipay sa mga katawhan nga hingbalik na ang kadasig ug kaaktibo sa mga katikaran bisan tuod duna pay pandemya. Sama sa gikaingon ni Lorena Asombrado, myembro sa LCCP, mapasalamaton gayod siya sa labawng Makagagahom sa higayon nga maka saulog niining kapistahan sa Mahal nga Inahan.

Dili lamang ang kapistahan sa Medalya Milagrosa ang gitimbaya sa tibuok simbahan apan apil sab ang bag-ong tuig sa liturhikanhong kalendaryo diha sa pagsugod sa Panahon sa Adbyento. Ang mga pagbasa puno sa paglaom ug diha sa pagpangandam sa umaabot nga kalibutan.

Dinha sa tema nga, “Birhen Maria kauban sa paglawig sa mga piniyalan ug pag-atiman sa simbahan ug kinaiyahan,” napuno ug nagkalain-laing mga kalihokan ang parokya. Dunay mga bunyag ug kasalan nga gipahitabo ug duna sa’y Blood Letting ug Mural Painting nga nagpakita sa kabililhon sa pag-amuma sa kinaiyahan. Niadtong adlawa usab gitapos ang Purok Making Contest nga nagsugod pa niadtong Nobyembre 13, adlawng Dominggo ug labaw na ang gikahimut-an ug gikahidlawan sa mga katawhan nga lechon roasting.

Ang mga anchors nga sila Fritzie Galyn Sanchez ug Kennis Moral nagdungag sa kalipay sa pagsaulog sa live coverage sa Pontifical Mass sa alas syete sa buntag nga gipangulohan sa arsobispo sa Dabaw, Most Rev. Romulo G. Valles nga naghagit sa mga katawahan nga andamon ang kaugalingon sa pagsuot sa biste sa kahayag.