Adlaw sa mga PSL

Niadtong Nobyembre 20, 2022 gisaulog ang kapistahan Ni Kristo nga atong Hari. Kini usab nga adlaw mao ang kasumaran sa pagkamugna sa Ministriya sa Pangulo sa Liturhiya sa parokya og kini nga mga selebrasyon angayan gayud nga tagaan og dakong luna sa tagsa-tagsa nato ka mga kasing-kasing, sa tumong nga mahimuot kanato ang Ginoo. Kini ang hulagway nga atong makita sa parokya sa San Roque Parish, Malabog.

Sayo nga takna sa kabuntagon gisugdan ang Santos nga Misa nga gipangulohan ni Father Arnold Balaquinto, Kura Paroko. Sa maong selebrasyon, anaa ang baga kaayo nga presensiya sa mga PSL uban sa ilang Coordinator nga si Brother Aldung Casanillo og gani ang mga magbabasa, salmista og ingon man ang lectors, naggikan man sa ilahang ministriya. Sa homiliya ni Father Arnold, siya nagsaysay, “kinahanglan tugotan nga ang Dios kanunay sentro sa atong kinabuhi, and everything follows. Tungod niana, gikinahanglan nato nga magpaubos. Sama ni Hesus kinsa Hari, nga wala magsuot sa mahalon nga bisti, ni sa bulawan nga korona, apan tunokon hinuon, og nagbitay sa Krus. Kini ang pagpadayag ni Hesus nga ang pagka-Hari dili makita sa nawong, apan sa pagpaubos sa kaugalingon og pagpangalagad sa uban. Usa ka parokya, usa ka pamilya, diha sa pag-alagad nga mapaubasanon nga pagtahan sa kaugalingon”, dungag pa niya.

Sa maong selebrasyon anaa usab mga sakop sa Sona 2, PSA og SoCCom. Og gane ang SocCom man ang nanguna sa “picture taking” sa mga PSL uban ni Father Arnold, nga nahitabo gawas sa seminar house. Human niini, namauli na ang mga PSL sa tagsa-tagsa nila ka mga GKK, bitbit sa tam-is kaayo mga mensahe sa atong Dios, nga ilang ipaambit sa matag katilingban diha sa Kasaulogan sa Pulong nga adunay Pagkalawat.

Sa atong mga kasing-kasing, adunay mga nagkalain-laing unod ang matag bahin niini. Apan atong hinumduman nga si Kristo nga Hari, kinsa nahigugma pag-ayo kanato, mao lamang ang angayan nga mamahimong maka panag-iya sa pinakadakong luna niini. Atoang hinumduman nga ang pagkinabuhi sentro sa Ginoo, mao ang magtultol kanato sa kinabuhi nga walay katapusan.

Sa kanunay, Dalaygon ang Dios!

(Joze Comapas Crodua, SRP-Malabog SocCom | Photos by Imelda C. Overiz)