Kapistahan sa Mother of Mercy, Gikaluy-an

Ang grasya’g kaluoy nga gikan sa anak sa Dios pinaagi sa iyang inahan nga si Maria, nakita ug napamatud-an gayod sa mga deboto panahon sa kapistahan sa Mother of Mercy niadtong Nobyembre 16, 2022, adlawng Myerkules.

Tuod man giulan ug ngitngit ang kalangitan sa wala pa magsugod ang santos nga misa, apan nagpadayon gihapon ang mga deboto sa pagandam sa altar didto sa Mother of Mercy Shrine sa Brgy. New Carmen Tugbok. Napuno ang altar sa mga puti ug dalag nga mga bulak. Sa wala madugay, mibundak ang ulan ug naka desisyon nga ibalhin ug didto na lamang magmisa sa ilawom sa altar.

Sa pagbalhin sa mga bangko ug mano-mano nga pagpamitbit sa mga gamit alang sa santos nga misa nagkapaspas pud ang abot sa mga katawhan gikan sa lain-laing mga dapit aron sa pagpakita sa ilang debosyon sa inahan sa Hari sa kaluoy.

Samtang naganam-anam ug kadaghan ang mga katawhan, miabot sab ang pari nga si Rev. Fr. Jacob Biernacki usa ka misyonaryo gikan sa Marian Fathers of the Immaculate Conception aron sa paghatag ug mubong katesismo mahitungod sa Inahan sa Kaluoy kon Mother of Mercy.

Sa hapit na matapos si Fr. Jacob sa iyang pagpanudlo, nagkaanam usab ug kahayag ang mga panganod ug naka desisyon nga ibalik ang han-ay sa altar tungod ninglaom ang katawhan sa kaluoy sa mahal nga inahan nga dili na mubalik pa ug ulan.

Napuno ang mga lingkuranan sa mga deboto ug sa mga katawhan bisan sa kalay-on niining maong shrine gikan sa syudad. Nakita gayod ang ilang dakong paglaom sa gahom sa ilang mga pag-ampo.