Magpabilin nga Nagmata

Unang Domingo sa Adbiento (November 27, 2022)
Is 2:1-5 / Rom 13:11-14 / Mt 24:37-44

Karong adlawa opisyal nga nagsugod ang bag-ong liturhikanhong tuig. Ang panahon sa Adbiyento, kansang ngalan nagkahulogan sa “pag-abot”. Si Hesus nagpadayon sa pagsulod sa atong mga kasingkasing ug kinabuhi karon ug sa matag adlaw, ilabina pinaagi sa mga sakramento, uban sa Balaan nga Eukaristiya ingon nga kinapungkayan, apan pinaagi usab sa pulong sa Dios, pag-ampo, mga buhat sa praktikal nga gugma, ug uban pa.

Aron makapangandam sa pagbalik sa Ginoo, kinahanglang huna-hunaon sa mga Kristohanon ang matag adlaw nga panalangin, kay dili gayod kita makasiguro kung kanus-a ang katapusan. Dugang pa, kinahanglan nga dili nato kalimtan ang usag-usa. Sama sa gitudlo sa unang pagbasa, kita molihok nga maloloy-on ug mahigugmaon samtang kita nagtinguha sa pagsunod ug paglakaw diha sa kahayag sa Ginoo.

Niining liturhikanhon nga panahon sa Adbiyento, atong gipaabot ang ikaduhang pag-anhi ni Hesu Kristo pinaagi sa paghinumdom dili lang sa iyang pagkahimugso sa Pasko kondili sa saad usab nga ang atong Ginoo mobalik sa himaya aron hukman ang mga buhi ug mga patay. Makapangandam kita pag-ayo pinaagi sa pag-apil sa mga buhat sa gugmang putli, pag-ampo, pagpamalandong, pagkumpisal, pagpasaylo niadtong nakadaot kanato, ug pagpangayo og pasaylo niadtong atong nabuhat nga sayop.

Ang pag-adto sa selebrasyon sa Eukaristiya ug pag-ambit sa Balaang Komunyon mao ang labing epektibo nga paagi aron makapangandam alang sa Ikaduhang Pag-anhi ni Kristo. Adunay dili maihap nga mga gasa ug kusog nga gihatag kanato sa Eukaristiya nga makatabang kanato nga magpabiling matinud-anon hangtod sa pagbalik sa Ginoo. Ang Eukaristiya nagapadayon kanato ug hatag ug kusog aron dili ta mapul-an sa pagbuhat sa maayo, aron dili kita madala sa pagduhaduha o pagkawalay paglaom, ug aron dili ta magtinapulan sa pagbuhat sa atong pagtuo. Labaw pa niana, ang pagdawat sa Balaang Komunyon makapalagsik kanato aron kita mapadayunon nga magbantay sa pagbalik sa Ginoo. Hinaot nga kita magpabiling andam kay haduol na ang atong kaluwasan. (Bro. Angelo Espinas)