Katubagan sa mga Pangutana (Pagpangalawat)

Gdpm Brothers, ask lang ko sa time na magkalawat ta ang pari mangalawat ug mag-inom sa bino sama sa unod ug dugo ni Kristo, pero ngano sa manimbahay kalawat man lang dili man sila moinom ug bino? Maghulat ko sa inyong tubag. Noel of Panacan 0923-681****

“Salamat igsoong Noel sa imong pangutana. Panahon sa Santos nga Misa importante gayud nga anaa ang duha ka matang – pan ug bino ilabi na sa panahon sa konsagrasyon. Natural lamang nga ang pari mokaon ug moinom niini sanglit sila man ang  tinugyanan sa gahum nga makapabalhin sa pan ug bino ngadto sa lawas ug dugo ni Kristo. Gitawag kini ug transubstantiation o ang pagbalhin sa tinuod nga lawas ug dugo ni Kristo apan nagpabilin ang dagway niini sa pan ug bino (cf. Mateo 26:26-28, 1 Cor. 11:23-27 ug Juan 6:51, 56-58).

Busa kanang pan nga atong ginakalawat sa matag-misa buhing lawas ni Kristo human kana konsagrahi sa Pari. Walay problema kung ang pan lamang ang atong kalawaton, kay kana buhing lawas man ni Kristo. Sa matag-kaon nato niana ang tibook Kristo ang atong gidawat. Ug ikaduha, tungod sa kadaghan sa manimbahay siguro nasayod ka igsoon nga sa matag oras nga adunay misa halos puno ang simbahan ug moabot sa ginatos ang ihap sa manimba sa matag-oras. Ikatulo,  tungod sa may pagka-mahal ang bino kay gama kana sa pure gayud nga duga sa ubas o grapes. Busa maglisod ang simbahan nga apili kita nga manimbahay paimnon pa niini. Kana gitawag ug ekonomikanhong rason nga angay usab natong sabton. Ikaupat, gipamalandongan pa pud sa simbahan unsaon pagmintenar sa kalimpyo sa atong pagaimnan tungod sa kadaghan nga moinom kung ugaling himoon na kini.

Sa ubang mga simbahan, labi na sa Estados Unidos, dunay mga parokya nga nagtugot sa pagpakalawat sa lawas ni Kristo ug sa pagpainom sa iyang dugo alang sa mga manimbahay. Mahimo usab kini kanato dinhi apan unya pa human pamalandongan ug tugotan sa mga Obispo. Tingali og dili pa karon ang hustong panahon.

Busa ang importante sa matag kalawat nato anaa ang katakus sa pagdawat sa lawas ni Kristo uban sa bug-os gayud nga pagtoo, kay kana buhing lawas man busa kon buhi gilangkob na niana ang buhing dugo usab ni Kristo.”