Katawhang Nangandoy

Napuno ang simbahan sa San Pedro Calungsod Quasi Parish sa ilang ika pito nga kapistahan. Bisan tuod dili pa dako ang ilang simbahan ug sa mga tolda lamang nanglingkod ang ubang parokyano makita ang kainit ug kadasig diha kanila. Sayo palang sa adlawng Byernes, duna nay mga katawhan nga nag-atiman sa ilang nagkadaiyang mga purok dili lamang tungod usa kini ka indigay o contest apan tungod malipayon silang mupaambit sa ilang mga grasya ngadto sa uban.

Dili kalikayan nga matagaan ug pansin ang mga kapulisan nga sayo pa nagbriefing nga duyog ang mga Auxiliaries alang sa seguridad sa mga katawhan. Gani kini maka hatag inspirasyon sa ubang mga parokya nga makaangkon ug susamang suod nga relasyon sa gobyerno labi na diha sa pagtinabangay sa pagbantay sa kalinaw og kahapsay sa lugar.

Tuod man ika-pito palang kini nga kapistahan apan sumala pa sa arsobispo, Most Rev. Romulo G. Valles, DD daw hanas na kaayo ang katawhan ilawom sa paggiya sa ilang kura nga si Reb. Padre Elvie Bordios. Ang kahan-ay sa pagpatigayon sa mga kalihokan apil na sa Santos nga Misa nagpakita ug pagtinabangay ug dedikasyon sa pagpangalagad.

Niining pistaha, gitandi sa arsobispo ang mga parokyano dinha sa salmo nga nag-ingon: “Ginoo mao kini ang katawhan nga nangandoy pagtan-aw sa imong nawong.” Gani iyang gipakanta ug usab ang salmista aron matagaan ug duso ug mapahinumdoman ang katawhan. Gilauman nga di muabot ang sunod tuig nga pista mosaka na kining simbahan sa pagkaparokya.