Mga Tigpasayon Sa Pre-Cana Nagbansay

Gatusan ka mga facilitators kon tigpasayon sa Pre-Cana nga mga sakop sa Family and Life Apostolate (FLA) sa nagkalainlaing parokya sa Arkidayosis sa Dabaw ang nagbansay sulod sa duha ka adlaw aron nga mapalambo pa ang kahibalo ug kahanas sa pagpahigayon ug Pre-Cana Seminar.

Matud ni Reb. Padre Orlando Angelia, Director sa FLA sa Arkidayosis sa Dabaw, dili na lecture type ang pagpahigayon sa seminar apan facilitating (pagpasayon) na, “You are like cooking and using ingredients. What and how is the delivery of the message; unsa ang imong menu?”

Iyang gipahinumdoman ang mga misalmot sa Facilitators’ Training Seminar (FTS) nga “dili atoa ang mensahe nga gipaambit apan iya sa simbahan.”

Ang approach kon diskarte karon mao ang accompaniment kon pagpakig-uban base sa (sinulat nga libro ni Papa Francisco) Amoris Laetetia, si Padre Angelia midugang.

Dili usab matapos diha sa Pre-Cana Seminar ang pakiglambigit sa mga Facilitators ngadto sa magpakasal apan hasta na usab human sa pagpakasal ilabi na sa sayo nga ang-ang sa ilang panag-uban isip magtiayon ug labaw na kadtong nakasinati ug irregular kon lisod nga kahimtang sa ilang relasyon.

“Dili biyaan,” siya midugang, ‘sa pre-cana, household type sama sa Bible sharing with follow-up gikan una hangtod lima ka tuig, sama sa tambag gikan sa Dicastery for Laity, Family and Life.”

Nahimong tig-paambit sa una ug ikaduhang adlaw sa FTS (Oct. 22 ug Oct. 29, 2022) mao sila si Padre Angelia ug Amelita Desquitado.

Sa unang adlaw, gipakita ni Padre Angelia ang pamaagi sa ensaktong pag-facilitate sa module kabahin sa personhood diin dunay partisipasyon ang mga nanambong pinaagi sa workshop or activity.

Gibahin sa 11 ka grupo nga gisagol ang mga partisipante sa nagkalain-laing mga parokya ug gitagaan ang matag pundok ug hisgutanan nga maoy i-presentar sa ikaduhang adlaw.

Gilauman nga ma-adapt sa mga misalmot sa FTS ang mga pamaagi sa pagpasayon alang sa mga hamtong nga mga learners nga hatagan unya sa Pre-Cana Seminar ug uban pang mga follow-up nga mga pagbansay.