Okay Lang Ba Gyud?

Dear Ate Emz,

Nagbulag kami sa akong asawa kaniadto 3 anyos pa among anak. Dili ko nalang idetalye ang rason, sa pagka karon duna na kami kanya2x nga kinabuhi nga gina atiman. Akong estranged wife dunay iya na nga love interest ug ako naa sab. Okay ang among tagsa2x ka kahimtang ug kinabuhi. Kana lang dili kami pa ma kasal kay tungod daghang proseso nga agian, labaw na ang galastusong pinansiyal. Okay lang ba nga magpabilin ang ingon aning estado sa pagpuyo?

Daghang Salamat,
Joel

* * * * * *

Dear Joel,

Ang mga istorya sa naguba nga mga relasyon kanunay makapasubo sa mga tawong naapektuhan niini. Apan gikinahanglan nga ang matag-usa magpadayon sa ilang kinabuhi. Kanang separasyon tingali ang labing maayo nga solusyon alang kanila nianang higayuna sa kaniadtong panahon. Ang pinakasubo sa tanan mao ang epekto niini sa anak nga 3 pa lang ka tuig.

Tungod kay ang kinabuhi kinahanglan nga magpadayon, ang matag usa lagmit mangita alang sa mas maayo nga relasyon ug dalhon uban kaninyo ang mga leksyon nga nakat-unan gikan sa nangaging relasyon. Busa, matud pa nimo, Joel, nakasulti ka nga okay na ang inyong tagsa-tagsa ka kinabuhi sa kasamtangan. Bisan pa, kung imong hunahunaon kini, sa pagka karon, adunay nakasamok sa imong daw “okay” nga kinabuhi. Ug kini tungod kay diha sa imong konsensya ug sa kailadman sa imong kasingkasing, nahibalo ka nga ang pagpuyo uban sa imong “partner” karon, dili legal o gipanalanginan pinaagi sa Sakramento sa Kasal, ug busa, batok kini sa sugo sa Dios. Mao kini ang pinaka importante sa tanan.

Ang pinansyal nga bahin sa pagminyo dili gyud usa ka daku nga isyu tungod kay mahimo nimo ang kasal nga wala’y daghang gasto sama sa mga engrande nga selebrasyon ug mga salo-salo. Ang importante kamong duha nga kaslonon, ang ministro/pari, ug ang saksi.

Ang imong pangutana nga “okay lang ba nga magpabilin ang ingon aning estado sa pagpuyo?” Sa prangka na pagka tubag ani, DILI GYUD OKAY kay kini batok sa sugo sa atong Ginoo. Nagatoo ako nga sa kailadman sa imong kasingkasing ug konsensiya nahibalo ka nga sala gyud kini. Mao nga dili gyud ka makasinati og kalinaw sa inyong pagpuyo. Mao nga bisag dugay ug kapoy ang pagproseso sa inyong annulment sa imong ex-wife, go for it and live according to God’s will. With this, your present relationship will be more blessed and your life together will be a source of grace because you have received the Sacrament of Matrimony.

Hinaot unta nga malamdagan ug magiyahan ka sa atong Ginoong Espirito Santo aron masubay nimo ang tama nga dalan sa kinabuhi.

God bless you more.
Ate Emz