Quo Vadis MSPC?

Sama sa tingog nga nangutana kang San Pedro sa dihang mo-ikyas siya sa mga maglulutos sa unang mga Kristyanos, mao usab ang gipangutana karon sa 350 ka mga delegado sa ika-17 Mindanao Sulu Pastoral Conference.

Ang 4 ka adlaw nga panagtigom sa mga obispo, kaparian, kamadrehan, mga konsagrado nga mga kalalaken-an ug kababayen-an, ug mga layko, gipahigayon sa Arkidayosis sa Cagayan de Oro niadtong Nobyembre 7-11, 2022.

Gipamalandongan sa tibuok kumperensya ang tema nga: The Gift of Faith and New Evangelization as a Synodal Church.

Sa ikaduhang adlaw, ubos sa sub-theme, “Missionary Commitment” gibalik-lantaw ang kasaysayan sa Kristyanismo sa Pilipinas lakip na ang paghidangat niini sa Mindanao ni Most Rev. Abel C. Apigo,D.D., obispo sa Dayosis sa Mati, nga giuluhan ug “Learning from the history of Evangelization in Mindanao.”

Milutaw ang kumon nga mga pagtulun-an sa group discussions nga mapasalamaton ang tanan sa paghidangat sa mga langyaw nga mga misyonaryo, 500 ka tuig na ang milabay ug 400 ka tuig sa Mindanao.

Busa ang dakong hagit karon sa mga lumilihok sa simbahan ug sa kinatibuk-ang mga katawhan sa Dios sa Mindanao mao ang pagpadayon sa misyon nga gisugdan sa mga misyonaryo sa pagpalapnag sa Maayong Balita ilabi sa mga hilit nga dapit ug ngadto sa mga kabus.

Pinaagi usab sa MSPC, nga nagsaulog sa ika-50 ka tuig, ipadayon ang talagsaon nga SYNODAL JOURNEY ug subling uyonan ang diwa sa synodo pinaagi sa pagpalambo sa maanindot nga komunyon sa simbahan sa Mindanao.

Photo: DCH

“Continue to invite people to the eternal banquet of the Lord – the Eucharist; go to the peripheries,” si Bishop Apigo namahayag.

Iyang gisugyot usab ang bag-ong mga frontiers sa ebanghelisasyon, sama sa Ecological conversion, ang apostolado alang sa mga overseas Filipino Workers ug mga migrante isip mga misyonaryo ug uban pang mga sektor, ug paminawon ang tingog sa mga layko.

Dakong kalipay nga nakighiusa ang tanang mga delegado sa kasaulogan sa Santos nga Yukaristiya nga gipangunahan ni Papal Nuncio, Archbishop Charles Brown.

Iyang gidasig ang mga delegado sa pagtahan sa kaugalingon, pagkamamugnaon ug pagbaton ug kaisog sa pagsangyaw sa Maayong Balita sa kaluwasan pinaagi kang Kristo.

“We are unprofitable/unworthy servants – what are we obliged to do? The love of God impels us to proclaim the person of Christ, our Saviour,” namahayag si Abp. Brown.

Giaghat ni Abp. Brown ang tanan nga mamahimong mga misyonaryo nga adunay pagtagad sa kinaiyahan pinaagi sa dili pagpasagad.

Ang ikaduha mao ang pagpuyo diha sa kaangayan tali sa isigka-tawo, ma Kristyano man o dili.

Photo: DCH

Ang ikatulo nga level sa commitment alang kang Abp. Brown mao ang pagka-maampoon, kon pagpalambo sa relasyon tali sa Dios, kinsa maoy nagmugna sa matag usa.

“None of us was created by us. No one asked you, if you want to be created,” ug midugang nga, “God created you in His love.”

Iya usab nga gisaysay ang sinugdanan sa kapilya sa istorya ni St. Martin de Tours kansang kapistahan gisaulog adlawng Biyernes, Nobyembre 11, 2022.

Sa laing bahin, gisaysay usab ni Most Rev. Ronald I. Lunas, D.D., Obispo sa Pagadian ang mahitungod sa Basic Ecclesial Community kon Gagmayng Kristohanong Katilingban (GKK) diin nasinati ang synodality ug espiritualidad nga gipadayag sa pagka-piniyalan.

Midugang si Bp. Lunas nga ipadayag usab ang pagka-piniyalan sa simbahan pinaagi sa pagwagtang na sa arancel kon mga standard fees sa mga services.

Busa iyang gidasig ang tanang delegado nga dili angayang mahadlok sa maong lakang nga gisugdan sa termino ni Catholic Bishops Conference of the Philippines (CBCP) Davao Archbishop Most Rev. Romulo G. Valles, D.D.

Hinoon madasigon nga namulong ang Papal Nuncio, Abp. Brown nga, “By our love, by our charity, never cease to proclaim Jesus Christ,” ug nagkanayon nga diha sa paghigugma sa mga kabus, masanagon ang kaugmaon sa simbahan.